My 3D Home Designs

 

වර්තමාන පොලිස්පතිවරයා ගැන මගේ අත්දැකීම.

වර්තමාන පොලිස්පතිවරයා මට මුලින්ම හම්බ වෙන්නේ 2018 වර්ෂයේ මහජන ආරක්ෂක අමාත්‍යංශයේදී.  ඒ කාලේ මේ අමාත්‍යංශය හැදින්නුවේ නීතිය හා සාමය අමාත්‍යංශය කියලා.

සතියකට එක දවසක් පොලීසිය භාර ඇමතිවරයා හම්බ වෙන්න  දවසක් වෙන්කරලා තිබුනා. 

ඉතින් ඒ දවසක  මම ගියා ඇමතිවරයා  හම්බ වෙන්න. එතකොට ඇමති හිටියේ රංජිත් මද්දුම බණ්‌ඩාර. එදා මම ගියේ පොලීසියේ යුද්දෙන් සහ නීතිය ආරක්ෂා කිරීමේ රාජකාරි වලදී, පූර්ණ ආබාධිත වෙලා ගිලන් ඇදන් වලට, රෝද පුටුවලට සීමාවෙලා ජීවත් වෙන මගේ සහෝදර නිලධාරීන් 27 දෙනාගේ ගැටලු ගැන සාකච්ඡා කරන්න. ඔය සාකච්ඡාවට පොලීසිය පැත්තෙන් සහභාගි වෙලා හිටියේ වර්තමාන පොලිස්පතිවරයා.  ඔහු ඒ වෙන කොට ජ්‍යෙෂ්ඨ නියෝජ්‍ය පොලිස්පති පරිපාලන දිශාව භාරව කටයුතු කලා. 

මම ඇතුලු පූර්ණ ආබාධිත නිලධාරීන් 27 දෙනා බරපතල ගැටලු රාශියකට මුහුණ දෙමින් හිටියේ...  අපි වගේ පූර්ණ ආබාධිත තත්ත්වයට පත්වෙලා ඉන්න ත්‍රිවිධ හමුදාවේ සාමාජිකයින් රැක බලා ගන්න පුනරුත්ථාපන මධ්‍යස්ථාන විශාල ප්‍රමාණයක් තිබුනත්, පොලීසියේ අපට එක මධ්‍යස්ථානයක් තිබුනේ නෑ. ඒ වගේම සාමාන්‍ය තත්ත්වයෙන් ආබාධිත නිලධාරියෙකුට වඩා මේ පූර්ණ ආබාධිත නිලධාරීන්ට වැඩි වියදමක් ඔවුන්ගේ නඩත්තු කටයුතු සදහා වැය කරන්න සිද්ධ වෙලා තිබුනා.  රෝද පුටුවලට, වෛද්‍ය ප්‍රතිකාර වලට වගේම දෛනික කටයුතු තනිවම කරගන්න  බැරි සමහර නිලධාරීන් රැක බලාගන්න උපස්ථාදායකයෙකුගේ සේවය ලබා ගන්නත් ඔවුන්ට මුදල් වැය වුනා. මේ නිසා ඔවුන්ට ලැබෙන වැටුප කෙසේවත් මේ අමතර වියදම් සදහා ප්‍රමාණවත් වුනේ නෑ. ඔවුන් ජීවත් වුනේ දැඩි ආර්ථික දුෂ්කරතා රාශියක් මැද. මේ නිලධාරීන් රැක බලා ගන්න පොලීසිය කිසිම පියවරක් අරන් තිබුනේ නෑ...

ඇමතිවරයාට මම මේ නිලධාරීන් පත්වෙලා ඉන්න තත්ත්වය ගැන පැහැදිලි කරන්න ආරම්භ කලා විතරයි....

'ආ.. අමතර දීමනාද ඉල්ලන්නේ...? එහෙම දීමනා නම් දෙන්න විදියක් නෑ. ඒකට තමයි ඔයාලට පඩියක් ගෙවන්නේ.. " 

මට ගැටලුව හරිහැටි පැහැදිලි කරන්නවත් අවස්තාවක් නොදී ඇමතිවරයා සියල්ල දත් වගේ උත්තර දුන්නේ ඔන්න ඔහොම. මම හීනෙකින්වත් හිතුවේ නෑ ඇමතිගෙන් මට ඒ වගේ උත්තරයක් ලැබෙයි කියලා. මට ඔහු ගැන හරිම කලකිරීමක් ඇති වුනේ. ඔන්න ඔහොම තමයි රංජිත් මද්දුම බණ්‌ඩාර පොලීසියේ රාජකාරිය ඉටුකරන්න ගිහින් විපතට පත්වුන නිලධාරීන්ගේ ගැටලු විසදුවේ... 

"සාමාන්‍ය තත්ත්වයෙන් ආබාධිත අයට නම් ඔය පඩිය සෑහෙනවා..., ඒත් මං මේ කතා කරන්නේ, තව කෙනෙක්ගේ උදව්වක් නැතිව දෛනික කටයුතු ටිකවත් කරගන්න බැරි රෝද පුටුවල, ඇදන් වල ජීවත් වෙන පූර්ණ ආබාධිත නිලධාරීන් ගැන සර්...."

හිතට ඇති වුන කලකිරීම වේදනාව යටපත් කරගෙන මම ටිකක් දැඩි ස්වරූපයෙන් ඇමතිවරයාට කරුණු පැහැදිලි කරේ, ඔහු මේ ගැන ගන්න ක්‍රියාමාර්ගය ගැන දැනගන්න. 

"සර්..., මෙයාලට අපි පොලිස් විරු සෙවණක් හදන්න හොරණින් ඉඩමක් අරන් තියෙන්නේ, ඒකට සල්ලිත් පාස් වෙලා තියෙන්නේ ඒක අපි දැන් ඉක්මනට හදනවා, එතකොට මෙයාලගේ ගැටලුව විසදෙනවා සර්...

 වර්තමාන පොලිස්පතිවරයා ඇමතිවරයාට ඔන්න ඔය විදියට  තමයි අපේ ගැටලුව විසඳන ආකාරය ගැන පැහැදිලි කරේ. තවත් ප්‍රශ්න කප්පරයක් තිබුනත්, දෙන්න ගෙන්ම ලැබුන ප්‍රතිචාරය එච්චර සුබවාදී නොවුන නිසා මම එන්න ආවා. ඔය ඔහු හම්බ වුන පලවෙනි අවස්ථාව.

දෙවෙනි වරට මට ඔහු හම්බ වෙන්නේ අවුරුදු එක හමාරකට විතර පස්සේ 2019 වසරේ දවසක. ඒත් නීතිය හා සාමය පිළිබඳ අමාත්‍යාංශයේදී. එතකොට ඔහු වැඩ බලන පොලිස්පතිවරයා. කලින් සැරේ ඔහු කිව්ව පොලිස් විරු සෙවන හදන්න තබා මුල් ගල වත් ඒ වෙන කොට තියලා තිබුනේ නෑ. වෙනත් කිසිම සහනයක් මේ නිලධාරීන් වෙනුවෙන් ලබාදීලා තිබුනෙත් නෑ. 

ඒ සාකච්ඡාවට ජනාධිපති මෛත්‍රීපාල සිරිසේනගේ  කාර්යය මණ්ඩල ප්‍රධානියා ලෙස කටයුතු කල උන්නැහෙත්, අමාත්‍යාංශ ලේකම්වරයාත් සහභාගි වෙලා හිටියා. මේ දෙන්න අපේ ගැටලු විමසුවේ කොහොමද කියල මේ ලින්ක් එකේ තියෙනවා

පොලිස්පති පොරොන්දු වුන පොලිස් විරුසෙවන ගැන අහන්න  මම සූදානම් වෙනකොටම,

"ආ ඔයාලට විරු සෙවනවල් වගේ project එකක් හරියන්නේ නෑ, ඔයාලට මොකක් හරි package  එකක් තමයි හරියන්නේ, ඔයාලගේ ඔය ප්‍රශ්න ටික ඔක්කොම ලියාගෙන සිකුරුදා ඇවිත් මාව හම්බ වෙන්න කෝ...."

ඔන්න ඔහොම තමයි ඒ සාකච්ඡාවේදී එතුමා හැසුරුනේ... අපේ ප්‍රශ්න වලින් සූර විදියට ලිස්සලා යන විදියක් දැනුනත්, සිකුරාදා හම්බ වෙන්න අවස්ථාව දුන්න නිසා ඒ ගැන බලාපොරොත්තුව තියා ගත්තා. 

කොහොම හරි ඒ සිකුරාදා අපි පොලිස් මූලස්ථානයට යනකොට එතුමා යාපනේ ගිහින් හිටිය. ඒ නිසා ඒ සිකුරාදා අපි රස්තියාදු වෙලා ගෙදර ආවා. නමුත් පස්සේ දවසක් පොලිස් මූලස්ථානයේදී ඔහුව හම්බ වෙන්න  අවස්ථාව ලැබුනා.

මම ගැටලු 07 ක් ලියාගෙන ගියාට එක ගැටලුවයි පැහැදිලි කරන්න ලැබුනේ. ඒ ගැටලුව තමයි පොලීසියේ පරිපාලනමය දෝෂයක් නිසා ක්‍රියාත්මක නොකල චක්‍ර ලේඛණයක් නිසා අපට නොලැබුන දීමනා වල හිඟ මුදල් ලබාගැනීම.

ඉතින් ඔහු කිව්වේ ඒකට මුදල් ජනාධිපතිවරයාට කියලා ගන්න ඕනි, ඊලග දිනයේ ජනාධිපතිතුමා හම්බ වෙන්න ගිහිල්ලා, මේ ගැටලුව කෙටියෙන් ජනාධිපතිතුමාට පැහැදිලි කරලා වචනයක් ගන්න කියලා.

පොලීසිය භාර ඇමතිවරයා හැටියට එවකට කටයුතු කලේ හිටපු ජනාධිපති මෛත්‍රීපාල සිරිසේන මහතා.

ජනාධිපතිවරයාට මම කරුණු ඉදිරිපත් කලාට පස්සේ පොලිස්පතිවරයාට  දැනුම් දුන්නේ....

"මේ රෝද පුටුවල, ඇදන්වල, අමාරුම තත්ත්වෙන් ඉන්න 30 දෙනාට ඔය හිඟ දීමනා ටික මුලින්ම දෙන්න.... ජීවිතාන්තය දක්වා වැටුප් දෙන්න සකස් කරන කැබිනට් සංදේශයට මෙයාලත් ඇතුලත් කරන්න එහෙම සංශෝධනය කරන්න බැරි නම් මෙයාල වෙනුවෙන් වෙනත් සංදේශයක් ඉදිරිපත් කරන්න...." 

පොලිස්පතිවරයා මට පවරපු වගකීම අනුව ජනාධිපතිවරයාගෙන් ඔය වගේ සුබවාදී පිලිතුරක් අරන් දෙන්න මට පුලුවන් වුනා. 

මාස ගනනාවක් ගත වූනත්, ජනාධිපති ලබාදුන් ඒ උපදෙස් අනුව අපට සහන සලසන්න පොලිස්පතිවරයා කටයුතු කර තිබුනේ නෑ. ඒ ගැන විමසලා යවපු එක ලිපියකටවත් අද වෙනකම් කිසිම උත්තරයක් එවන්න වත් කටයුතු කර නැත. 

එදා ජනාධිපතිවරයා ලබාදුන් උපදෙස් අනුව කටයුතු කලා නම් පොලීසියේ රාජකාරි කරන්න ගිහින් විපතට පත්වුන නිලධාරීන්ට විශාල සහනයක් අත්වෙලා... නමුත්,

අවුරුදු 04 ක් පමණ පොලිස්  පති ධූරය දරලා ඔහු විශ්‍රාම යන්නේ ඒ වගකීම් කිසිවක් ඉටු නොකරය. 

අපි ඔහුට රැවටුනා නොව අපි ඔහු විස්වාස පමණි.

🛑 යුක්තිය උදෙසා සටන් වැදීමෙන් කුරිරු පලිගැනීමකට ලක්වීම.....03

 පොලිස් රෝහලේ පාලන අධ්‍යක්ෂවරයා වැසිකිළියට රෝද පුටුවෙන් ප්‍රවේශ පහසුකම් නැති පරීක්ෂකවරුන්ගේ වාට්ටුවට මා ඇතුලත් කොට පලිගැනීමට උත්සාහ කිරීම ගැන මහජන ආරක්ෂක අමාත්‍යවරයාට, ලේකම්වරයාට හා පොලිස් වෛද්‍ය දිශාව භාර ජ්‍යෙෂ්ඨ නියෝජ්‍ය පොලිස්පතිට මම පැමිණිලි කලෙමි.

එම පැමිණිල්ලට මහජන ආරක්ෂක අමාත්‍යංශයේ ලේකම්තුමා විසින් 2023 පෙබරවාරි 13 දින මට පිලිතුරු ලිපියක් එවා ඇත.

මේ ලිපියෙන්,
පොලීසිය කණිෂ්ඨ නිලධාරීන්ට,
රාජකාරියේ යෙදී සිටියදී ආබාධිත වුන නිලධාරීන්ට හා,
විශේෂ අවශ්‍යතා සහිත ආබාධිත නිලධාරීන්ට,
,සහන සැලසීම, රැකවරණය ලබාදීම, ඔවුන්ගේ මානව අයිතිවාසිකම් ආරක්ෂා කරදීම සම්බන්ධව
බලධාරීන් කටයුතු කරන්නේ කෙසේද යන්න මැනවින් පිළිබිඹු කොට ඇත.

මට සාධාරණය ඉටු නොවීම සම්බන්ධව, නැවැත ලිපියක් මහජන ආරක්ෂක අමාත්‍යතුමාට හා එම ලේකම්තුමාට 2023.02. 22 දින Fax කලෙමි.

එම ලිපියෙන් මට සිදුව තිබෙන අසාධාරණය සම්බන්ධව සියලු තොරතුරු දැනුම් දුන්නෙමි. ඒ සම්බන්ධව ක්‍රියාත්මක වීමට ඔවුන් ට යම් කිසි කාල අවකාශයක් ලබාදී බලා සිටින්නෙමි.

විරාමයක්.......

පලමු කොටසට..

🛑 යුක්තිය උදෙසා සටන් වැදීමෙන් කුරිරු පලිගැනීමකට ලක්වීම.....02.

♦️නින්දිත ලෙස අවමන් කිරීම. 

"මිනිහට ඔය වෙඩි වැදිලා තියෙන්නෙත් මිනිහගේ අතෙන්ම මිස් ෆයර් එකක් වෙලා... කොහෙද ගාමන්ට් එකක් ළඟ කෙල්ලෙක් එනකම් පිස්තෝලේ කරකව කව ඉදලා ඒක පත්තු වෙලා වෙඩි වැදිලා තියෙන්නේ.."

මම හීනෙකින්වත් බලාපොරොත්තු නොවුන ආකාරයේ ඉතාමත්ම පහත් නින්දිත ආකාරයේ මඩ ප්‍රචාරයක් පොලීසියේ මේ උසස් නිලධාරීන් විසින් මට එරෙහිව මේ දිනවල ක්‍රියාත්මක කරමින් සිටී. මේ නින්දිත මඩ ප්‍රහාරය, වෙඩි ප්‍රහාරයෙන් මා ලත් තුවාල වලට වඩා වේදනාවක් මගේ ගතට සිතට දැනෙයි. සදාකාලිකව ආබාධිත තත්ත්වයට පත්වෙලා රෝද පුටුවක ජීවත් වෙන්න ඉරණම තීන්දු කලාට වඩා දරුණු කම්පනයකට එය මා ලක් කර ඇත.

ඇත්තටම මම යුක්තිය සාධාරණය ඉටු කරන්න ගියේ අහිංසක දුප්පත් තරුණයෝ හතර දෙනෙකුට. ඔවුන්ව, විදේශ රැකියා වලට යැවීමට පොරොන්දුව මුදල් වංචා කල පුද්ගලයෙක් අත්අඩංගුවට ගන්නා අවස්ථාවේදී පොලිස් කොස්තාපල් 32493 රාජපක්‍ෂ නිලධාරියා ඉතාමත් අපරීක්ෂාකාරි අන්දමෙන් රිවෝල්වරය පාවිච්චි කිරීමෙන් එය ක්‍රියාත්මක වීම නිසයි, මට වෙඩි වැදුනේ. වෙඩි ප්‍රහාරය එල්ලවුනේ මගේ කොන්දේ පිටුපස සුෂුම්නාවට අඟලක් පමණ ආසන්නයෙන්. උණ්ඩය පිටවුනේ දකුණු පෙනහැල්ල හා අක්මාව හානිකරගෙන. 

මේ අඳ බාලයන් කියන පරිදි පිටකොන්දට මේ ආකාරයෙන් මිස් ෆයර් එකක් ඇරගත් ලෝකේ ප්‍රථම මනුස්සයා මා විය යුතුයි. මිස් ෆයර් එකකින් කෙසේ වෙතත්, වෙඩි උණ්ඩය වැදිලා තියෙන තැනට හිතලවත් වෙඩි තියාගන්න පුලුවන් කිසිම ජගතෙක් මේ ලෝකේ නෑ... මේ අභූත චෝදනාව එල්ල කරමින්, මට අවමන් සිදුකරන ජ්‍යේෂ්ඨ නිලධාරීන්ගේ දැනුමේ දිග පලල කොපමණදැයි විමසා බැලීම වටී.

මට වෙඩි වැදුනත්, සැකකරුට පලා යන්න ඉඩක් ලැබුනේ නෑ... සැකකරුව අධිකරණය ට ඉදිරිපත් කරලා තරුණයන්ට වංචාකල මුදල් නැවත ලබාදීමෙන් අනතුරුවයි මගේ ඒ අවසන් වැටලීම, රාජකාරිය නිමා වුනේ...

මේ සියලු කරුණු කාරණා පොලීසියේ සටහන් පොත් වලත්, අධිකරණයේ ලේඛණ වලත් සටහන් වෙලා තියෙනවා. ඊටත් අමතරව මේ සිද්ධිය සම්බන්ධව පරීක්ෂණ මණ්ඩල වාර්තාවද සාක්ෂි දරයි. සිද්ධිය සම්බන්ධව මේ සියලු සාක්ෂි තිබියදී මේ අඳ බාලයන් පවසන්නේ ඇත්ත සිද්ධිය පොලීසිය විසින් වෙනස් කර ඇති බවයි. අධිකරණයේ සාක්ෂි තිබියදී, වෙඩි තැබු නිලධාරියා එය පිලිගෙන තිබියදී, එවකට මා සමග රාජකාරි කල නිලධාරීන් සියලු දෙනා සිදුවීම සම්බන්ධව සාක්ෂි දරද්දී, තුට්ටු දෙකේ පොලිස් කාරයෙක් මට කුහක සිතින්, මට විරුද්ධව, ද්වේශසහගත ව නිර්මාණය කල මඩ ප්‍රචාරය සත්‍ය සිද්ධිය ලෙස හිස් මුදුනින් පිලිගෙන, පොලිස් රාජකාරිය වෙනුවෙන් ශරීරාංග පුජා කල නිලධාරියෙකුට Meeting වලදී අවමන් කිරීමට කටයුතු කරන ජ්‍යෙෂ්ඨ නිලධාරීන්, නිලධාරීනියන් තම නිලබලයෙන් බේරී සිටියත්, සොබාදහමේ විනිශ්චයෙන් නම් කෙදිනකවත් ගැලවීමක් නොලැබෙනු ඇත.

යුක්තිය උදෙසා සටන් වැදීමෙන් කුරිරු පලිගැනීමකට ලක්වීම.....01.

උහුලගන්න බැරිතරම් අසාධාරණකම් සිද්ධ වෙද්දී, ඒවා ගැන මොකුත් නොලියා, අමාරුවෙන් ඉවසා දරාගෙන හිටියේ, උසස් නිලධාරීන් ඒවාට නිසි සාධාරණය ඉටු කරයි කියලා බලාපොරොත්තුවෙන්. එහෙම නැත්නම්, ඒ නිලධාරීන්ට ඉහලින්ම සිටින අමාත්‍යවරයාවත්, සාධාරණය ඉටුකරයි කියලා බලාපොරොත්තුවෙන්.
ඒත්.....,
නැවැත ඔවුන්ට ප්‍රයෝජනයක් ගත නොහැකි, අප වැනි ආබාධිත, කණිෂ්ඨ පොලිස් නිලධාරීන්ට, කිසිදිනක ඔවුන් සාධාරණය ඉටු නොකරන බවට, මේ වෙන කොට ඔප්පු කර හමාරයි.

උසස් පොලිස් නිලධාරීන් කීප පොලක්, දිගින් දිගටම මගෙන් පළිගැනීමට, අසත්‍ය චෝදනා එල්ල කිරීම සම්බන්ධව, සත්‍ය තොරතුරු එළිදරව් කිරීමට, බලධාරීන් ගෙන් මම කීපවරක් ඉල්ලා සිටියත්, ඔවුන් එයට මට අවස්ථාව ලබා දුන්නේ නැත.. මේ හේතුවෙන්, මට තීරණයක් ගන්න සිද්ධ වුනා මට සිදුවුන, සිදුවෙන, අසාධාරණකම්, පළිගැනීම්, හා එල්ලකරන අසත්‍ය අභූත චෝදනා ගැන රට හමුවේ එළිදරව් කරන්න....

 
මගේ මිතුරු ලැයිස්තුවේ හැමෝගෙන්ම මම ඉල්ලා සිටින්නේ, මේ ලිපිය ටිකක් දිග වුනත් කියවන්න. ශ්‍රී ලංකා පොලීසිය වෙනුවෙන් නීතිය ක්‍රියාත්මක කර, දුප්පත් තරුණයින් පිරිසකට, යුක්තිය, සාධාරණය ඉටු කිරීමේ රාජකාරියකදී, ආබාධිත තත්ත්වයට පත්වු, පොලිස් නිලධාරියෙකුට අත්ව ඇති, ඉරණම ගැන දැනගන්න.


පොලිස් රෝහලේ පාලන අධ්‍යක්ෂ, රෝද පුටුවෙන් වැසිකිලියට ප්‍රවේශ පහසුකම් නැති වාට්ටුවකට ඇතුලත් කොට කුරිරු ලෙස පළිගැනීම.


2023.01. 29 දින, ඩෙංගු රෝගය වැළදීමෙන් අසාධ්‍යව නාරාහේන්පිට පොලිස් රෝහලට ඇතුලත් වුනෙමි.


රෝහලේ පොලිස් පරීක්ෂකවරුන්ට වෙන් කර ඇති වාට්ටු අංක 06 හි, වැසිකිළියට රෝද පුටුවෙන් ප්‍රවේශ පහසුකම් නොමැත. එහි වැසිකිලියේ දිග අඩි 5 කට අඩු අතර පලල අඩි 2යි අඟල් 11 ක් පමණි. මේ නිසා වෛද්‍ය සේවා අධ්‍යක්ෂතුමා මගින් රෝහලේ පාලන අධ්‍යක්ෂතුමාගෙන්, රෝද පුටුවෙන් වැසිකිලියකට ප්‍රවේශ පහසුකම් සහිත කාමරයක, නේවාසිකව ප්‍රතිකාර ලබාගැනීමට, ලිඛිතව අවසර ඉල්ලා සිටියෙමි. ඒ සඳහා වෛද්‍ය සේවා අධ්‍යක්ෂතුමාගේ අවසරය ලැබුනත්, හිස් කාමර විශාල සංඛ්‍යාවක් තිබියදී, පාලන අධ්‍යක්ෂතුමා ඒ සඳහා අවසර ලබා දුන්නේ නැත. මේ හේතුවෙන්, රෝගාතුරුව සිටි මට දින දෙකක් සනීපාරක්ෂක කටයුතු ඉටුකර ගැනීමට නොහැකි වී, රෝගී තත්ත්වයද උත්සන්නව, දැඩි සේ පීඩා විඳීමට සිදු විය. එය මා මහත් කම්පනයටත්, සිත්තැවුලටත් පත්කරලීය.

https://www.facebook.com/586445182/videos/pcb.10167087444455183/721630716087820

විශේෂ අවශ්‍යතා සහිත ආබාධිත තැනැත්තන්ට, රෝද පුටුවෙන් ප්‍රවේශ වී, සනීපාරක්ෂක කටයුතු ඉටුකර ගැනීමට, ප්‍රමාණවත් ඉඩ කඩ හා පහසුකම් සහිතව, වැසිකිලියක් ඉදිකර තිබීම, එවැනි තැනැත්තන්ගේ මානව හිමිකමක් බව, ආණ්ඩු ක්‍රම ව්‍යවස්ථාවෙන් හා, ශ්‍රේෂ්ඨාධිකරණයේ නඩු තීන්දු ගණනාවකින් ම ආවරණය කර තිබුනත්, මගේ එම මානව හිමිකම් ඔහු අමු අමුවේ උල්ලංඝනය කලේ ඒ තීන්දු තීරණ, අණ පණත්, තුට්ටුවකටවත් මායිම් නොකරය. ඒ සදහා ඔහුට, තවත් ජ්‍යෙෂ්ඨ නිලධාරියෙකුගේ හා ජ්‍යෙෂ්ඨ නිලධාරිනියගේ සහාය ලැබී තිබුනි.


පාලන අධ්‍යක්ෂවරයා පළිගැනීම ට හේතුව....


පොලිස් රෝහලේ නේවාසිකව ප්‍රතිකාර ලබා ගැනීමට කාමර 05 ක් පොලිස් පරීක්ෂකවරුන්ට තිබිනි. පෙර දවස මම ප්‍රතිකාර ලබා ගත්තේ එම කාමරවල සිටයි. පසුකලෙක එම කාමර පාලන අධිකාරිය විසින් වෙනත් කටයුතු සඳහා යොදා ගෙන ඇත. මේ වන විට කාමර පහසුකම ඇත්තේ කාන්තා පොලිස් පරීක්ෂකාවන්ට හා සහකාර පොලිස් අධිකාරි නිලයෙන් ඉහල නිලධාරීන්ට පමණි. නමුත්, මීට පෙර පාලන අධ්‍යක්ෂවරුන් ලෙස කටයුතු කල මහතුන් මා රෝහල්ගත වූ සෑම අවස්ථාවකම, රෝහලේ වෙනත් ස්ථානයක පහසුකම් සහිත කාමරයක් ලබාදීමට, මගේ විශේෂ අවශ්‍යතා සම්බන්ධව සලකා බලා කටයුතු කර ඇත.

 
නමුත්, වර්තමාන පාලන අධ්‍යක්ෂවරයා හිස් කාමර කොපමණ තිබියත්, වෛද්‍ය සේවා අධ්‍යක්ෂතුමා ඇතුලු වෛද්‍යවරුන් මට එම පහසුකම ලබාදීමට ඔහුගෙන් ඉල්ලා සිටියත්, ඔහු එම ඉල්ලීම් සියල්ල ප්‍රතික්ෂේප කර වැසිකිළියට ප්‍රවේශ පහසුකම් නැති වාට්ටුව ට මා ඇතුලත් කිරීමට අවස්තා තුනක්ම උත්සාහා දරා ඇත. ඔහු මේ ආකාරයෙන් කටයුතු කරන්නේ ඔහුට ඉහලින් සිටින උසස් නිලධාරිනියක් මගෙන් පලිගැනීමේ චේතනාවෙන් ලබාදෙන උපදෙස් අනුවයි.


පොලීසියේ නීතිය හා සාමය ආරක්ෂා කිරීමේ රාජකාරි වලදී, ආබාධිත තත්ත්වයට පත්ව සිටින, නිලධාරීන්ගේ අයිතිවාසිකම් වෙනුවෙන් හා, ඔවුන්ට සිදුකර ඇති අසාධාරණකම් වලට එරෙහිව, මම හඬ නඟන්නෙක්මි. මේ නිලධාරීන්, අද වැටුප් ලබන්නේ, ඔවුන් වෙනුවෙන් මා තනිවම අරගල කොට, චක්‍ර ලේඛණ අණ පණත් සංශෝධනය කිරීමට කටයුතු කල නිසාය. රුපියල් ලක්ෂයකටත් වඩා අඩු වන්දි මුදලක් පමණක් ලබාදී, විශ්‍රාම ගැන්වු ආබාධිත නිලධාරීන්ට, අවුරුදු 16 කට පසු, මාසිකව, වැටුප් ලබාගැනීමේ විශාල සහනය මෙන්ම, ඔවුන්ට හිමි සියලුම දීමනාද ඒ සමඟ අත්කර දෙන්න, උරහිසේ තනි තරුවක් පැළැඳ සිටි, රෝද පුටුවේ ජීවත්වන මට හැකි වී ඇත. නමුත්, තරු ඔටුනු වලින් උරහිස බරවූ, ආබාධිත නිලධාරීන් ගැන මුලු මනින්ම වගකීම පැවරී ඇති උසස් නිලධාරීන්ට, අඩුම තරමේ ආබාධිත නිලධාරීන්ට, තමන් හිටපු පොලිස් නිලධාරියෙකු ලෙස හඳුන්වාදීමට හැදුනුම්පතක්වත්, ලබාදීමට අපොහොසත් වී ඇත.


ආබාධිත නිලධාරීන් රැකබලා ගැනීම සම්බන්ධව, රාජකාරිය, වගකීම, යුතුකම පැවැරී ඇති උසස් නිලධාරිනියක්, එය ඉටු නොකිරීම සම්බන්ධව, දිනක් මම ඇයගෙන් විමසා සිටීම ඇය මා සමඟ උරණ වීමට හේතුවයි.


පසුගිය කාලය පුරාම මම පසුවුයේ අසනීප තත්ත්වයෙනි. ඒ සියලු අසනීපයන්, ආබාධිත තත්ත්වය නිසා හටගන්නා අතුරු රෝගාබාධයන්ය. පසුගිය නොවැම්බර්
29 දින ද, මට රෝහල් ගතවීමට සිදුවිය. වෛද්‍ය සේවා අධ්‍යක්ෂතුමා හා වෛද්‍යවරු, පෙර මා නැවතී සිටි කාමරයේ සිට, ප්‍රතිකාර ගැනීමට පහසුකම් සලසා දීමට උත්සාහ කලද, , එවරද රෝහලේ පාලන අධ්‍යක්ෂ එයට අවසර ලබා දුන්නේ නැත. ඒ හේතුවෙන් අසනීප තත්ත්වය එලෙසම තිබියදී බලාපොරොත්තු සුන්ව, නැවැත මට මොණරාගලට ඒමට සිදු වීම, කොතරම් නම් පලිගැනීමකට, අසාධාරණයකට, මුහුණ දීමක්දැයි සාක්ෂි දරයි.


රෝහලකට රෝගියෙකු ඇතුලත් කරගනු ලබන විට රෝගියාගේ තත්ත්වය අනුව, ඇතුලත් කලයුතු වන්නේ කුමන වාට්ටුවකටද, කුමන ස්ථානයකටද යන්න, තීන්දු කිරීමේ වගකීම තිබිය යුත්තේ වෛද්‍ය සේවා අධ්‍යක්ෂතුමාටයි. නමුත්, පොලිස් රෝහලේ එම බලතල පවරාගෙන සිටින්නේ, වෛද්‍යවරයෙකු නොවන පාලන අධ්‍යක්ෂවරයායි. වෛද්‍ය කාර්යය මණ්ඩලය රෝගී නිලධාරීන්ගේ සුබ සිද්ධිය උදෙසා කටයුතු කරන්න උත්සාහ කරන සෑම අවස්ථාවකම එයට බාධා පමුණුවන්නේ මේ පාලන අධිකාරියයි.


පාලන අධ්‍යක්ෂවරයා මේ ආකාරයෙන් දිගින් දිගටම මගෙන් පළිගැනීම සම්බන්ධව, මහජන ආරක්ෂක අමාත්‍යංශයේ ටිරාන් අලස් අමාත්‍යතුමාට, ලේකම්තුමාට,ජ්‍යෙෂ්ඨ නියෝජ්‍ය පොලිස්පති, වෛද්‍ය හා සුබසාධක දිශාවට, පැමිණිළි හතරක් ඉදිරිපත් කොට ඇත. එහෙත් ඒවා සම්බන්ධව නිසි පියවර නොගැනීම, එම නිලධාරියාගේ පාර්ශ්‍රවයෙන් පමණක් කරුණු විමසීම. ඔහුත්, අනෙකුත් ජ්‍යෙෂ්ඨ නිලධාරීන් මා පිළිබඳව ඉදිරිපත් කර ඇති අසත්‍ය තොරතුරු පිළිගැනීම, මගේ පාර්ශවයෙන් කරුණු ඉදිරිපත් කිරීමට අවස්ථාවක් ලබා නොදීම නිසා, අද මට දැඩි අසාධාරණයකට මුහුණ දීමට සිදුවී ඇත.


පොලීසියේ ජ්‍යෙෂ්ඨ නිලධාරීන් කණිෂ්ඨ නිලධාරීන්ට කොපමණ අසාධාරණකම් සිදුකලත් ඉවසා දරා සිටිය යුතුයි. ඒ සම්බන්ධව ඉහල නිලධාරීන්ට පැමිණිළි කිරීමෙන් සිදුවන්නේ මේ ජ්‍යෙෂ්ඨ නිලධාරීන්ගේ පළිගැනීමට තව දුරටත් ලක්වීමයි. අද මට මුහුණ දීමට සිදු වී ඇත්තේ එවැනි ශෝචනීය තත්ත්වයකට බව ඔබහැමට අනාවරණය කරමි.

 #නාරාහේන්පිට_පොලිස්_රෝහල...

#Police_Hospital_Narahenpita....

නාරාහේන්පිට පොලිස් රෝහල මගේ ජීවිතේ ඉතාමත් සුවිශේෂී සංධිස්ථානයක් සනිටුහන් කල නවාතැනක්.

1999 වර්ෂයේ අගභාගයේ මම නාරාහේන්පිට පොලිස් රෝහලට ඇතුලත් වෙන්නේ දෙපයින් ඇවිදින්න හිටගන්න තියෙන හැකියාව සදහටම අහිමි වුන පූර්ණ ආබාධිතයෙකු හැටියට. නිරෝගී තරුණයෙකු ලෙසින් පොලීසිය ට එක් වුන මට ජීවිතේ බොහෝ දේවල් අහිමිව තමයි පොලිස් රෝහලට එන්න සිද්ධ වෙන්නේ...

ජීවිතේ බලාපොරොත්තු සිහින උඩු යටිකුරු වෙලා මානසිකත්වය අන්තිම බිංදුවටම කඩා වැටිලා හිටිය

මට ජීවිතේ ඉතිරි වෙලා තිබුන අවම දේවල් වලින් උපරිම පල ප්‍රයෝජන අරන් නැවත නැගී සිටින්න ශක්තිය ධෛර්යය ලැබුනේ නාරාහේන්පිට පොලිස් රෝහලෙන්..

රෝහලේ පොලිස් පරීක්ෂකවරුන්ට වෙන් වුන කාමර පෙලේ 10 වෙනි කාමරය අවුරුදු දෙකකට ආසන්න කාලයක් මගේ නවාතැන වුනා.... අත් දෙකත් ඔලුවත් විතරක් පාවිච්චි කරලා රෝද පුටුවක ආධාරයෙන් ජීවිතය ලස්සන ට ගෙවන්න වට පිටාව සකස් කරගන්න පියවරෙන් පියවර ඉදිරියට එන්න මේ කාමරයේ සෙවන මට ලබාදුන්නේ විශාල දායකත්වයක්.

අවි ආයුධ වලට හුරුවෙලා තිබුන මගේ අත් පින්සල් වලට, ලස්සන ලස්සන පාට වලට හුරු වුනේ මෙතනදී. චිත්‍ර ඇදීමේ හැකියාව මට සහජයෙන් උරුම වුන දෙයක්. ඉතින් ඒ හැකියාව යොදා ගෙන ජීවිතයට එල්ල වෙලා තිබුන අභියෝග, බාධක, කම්කටොලු ජය අරගෙන අවුරුද්දක් ඇතුලත චිත්‍ර ප්‍රදර්ශනයක් පවත්වන්නත් මම සමත් වුනා. ඒක පැවැත්තුවේ ජාතික කලා භවනේ "හුදකලාවේ ඇදි සිතුවම් " නමින්...

මම දන්න තරමට පොලිස් නිලධාරියෙකු පවත්වපු ප්‍රථම ඒක පුද්ගල චිත්‍ර ප්‍රදර්ශනය ඒක... මේ ප්‍රදර්ශනය පවත්වන්න මට බොහෝ දෙනෙක් උදව් කලා. ඒ ගැන සදහන් කරන්න ගියොත් මේ ලිපිය ගොඩක් දිග වැඩි වෙනවා. ඒ නිසා අද මගේ මාතෘකාවට අදාලව මේක....

සර් ආතර් සී ක්ලාක් ලෝ පතල විද්වතා මට හමු වෙන්නේ මේ චිත්‍ර ප්‍රදර්ශනයේදී. එතුමා තමයි මේ චිත්‍ර ප්‍රදර්ශනය පවත්වන්න මට අනුග්‍රහය දැක්වූයේ. ප්‍රදර්ශනයේ ප්‍රධාන ආරාධිත අමුත්තා වුනෙත් එතුමා.... එතුමාගේ ජීවිතේ දැක්ක ධෛර්යයවන්තම පුද්ගලයා මම කියලයි මාව එතුමා ඇගයීමට ලක් කලේ. මේ ප්‍රකාශය කලේ 2006 දී එතුමා අතින් මගේ පුද්ගලික වෙබ් අඩවිය එලිදක්වපු අවස්ථාවේ.

ඉතින් ඔය වගේ කාලෙන් කාලෙට රෝද පුටුවේ ඉදගෙන ලොකු, ලොකු වැඩ ගොඩක් කරන්න මට පුළුවන් වෙන්න මුල අඩිතාලම ලැබුනේ පොලිස් රෝහලෙන්....

පොලිස් රෝහලේ සේවය කල, කරන වෛද්‍යවරුන් ගෙන් කාර්යය මණ්ඩලයෙන් හැමදාමත් මට ප්‍රතිකාර වගේම ශක්තිය, ධෛර්යය, ආශිර්වාදය ලැබුනා. ඒ වෛද්‍යවරුන් ට කෘතවේදීත්වය පුදකරන්න ඔවුන් ගේ නම් සදහන් කල යුතුමයි.

විශේෂඥ වෛද්‍ය හර්ෂණී ප්‍රනාන්දු, මංජුලා රත්නවීර, එතුමිය තමයි පින්සල මගේ අතට පත් කලේ. මෙතුමිය මේ වන විට පදිංචිව සිටින්නේ නවසීලන්තයේ. අදටත් එතුමියගේ ආශිර්වාදය මුහුණ පොත හරහා මට ලැබෙනවා. එය ඉතාමත් සුවිශේෂයි. ඒ වගේම කැනඩාවේ වාසය කරන වෛද්‍ය සුනිල් පද්මසිරි මහත්තයත් මුහුණ පොත හරහා එදා වගේම අපේ හිතවත්කම පවත්වාගෙන යනවා. හිටපු ශල්‍ය වෛද්‍ය එල්ලාවල මහතා, වෛද්‍යවරුන් වන කාලිංග ගිනිගේ, යසවන්ත ද සිල්වා, කෝලිත රත්නායක, වෛද්‍යවරියන් වන චරක ද සිල්වා, ගයනි ආරියසිංහ වැනි අයත් මගේ මතකයට නැගෙනවා.

මේ පාර මට සති තුනක් විතර රෝහල් ගතව ඉන්න සිද්ධ වුනා. ඒ කාලය වැඩි අපහසුවකින් තොරව ගෙවාගන්න පුළුවන් වුනේ වෛද්‍යවරුන්ගෙන් හා වෛද්‍ය කාර්යය මණ්ඩලයෙන් නිරතුරුවම ලැබුන කාරුණික සම්බන්ධතාවයයි.

විශාල අභියෝග රැසකට මුහුණ දෙමින්, වෛද්‍ය සේවා අධ්‍යක්ෂ වෛද්‍ය චාමින්ද්‍ර රණසිංහ මහත්මයා අපහසුතාවයකින් තොරව ප්‍රතිකාර ලබාගැනීමට අවශ්‍ය පහසුකම් සලසා දුන්නා.... වෛද්‍යවරුන් වන දිනුක සෙනෙවිරත්න, මාරි බෝපේආරච්චි, සංජීව එදිරිසිංහ, තනුක හේවාවසම්, ක්‍රිෂාන්ත විජේනායක යන මහත්ම මහත්මීන් මෙන්ම, SPC Surgery එක ඉතාමත් පරෙස්සමෙන්, සාර්ථකව සිදු කල පොලිස් රෝහලේ ශල්‍ය වෛද්‍ය රෝහන විදානගේ මහතා ඇතුලු ශල්‍ය වෛද්‍ය ඒකකයේ නිර්වින්දන වෛද්‍යතුමියත්, වෛද්‍යවරුන් වන රවීන්ද්‍ර බස්නායක, ප්‍රදීප්, සුනෙත් මහත්වරුන්, එම හෙද කාර්යය මණ්ඩලයත්....

මගේ දෛනික කටයුතු හා ප්‍රතිකාර කටයුතු පහසුවෙන් ඉටු කරගැනීමට හැකි කාමරයක් සුදානම් කරදීමට, වෙහෙසුන සිස්ටර් ඉන්ද්‍රනි, හෙද නිලධාරීන් වන ලක්ෂමන්, චන්දන, කුසුම්තිලකත්, හෙද නිලධාරිනියන් වන රාජපක්ෂ, නිල්මිණි, කුමාරි, ලලිතානි, නිශාන්ති, දමයන්ති, චම්පිකා, හේරත් ශ්‍යානිකාටත්, මගේ දෛනික කටයුතු සඳහා සහාය දැක්වු වාට්ටු අංක 07 හි කාර්යය මණ්ඩලයේ රම්‍යා, නෙවිල්, සදා, පෙරේරා, නිහාල්ටත්, රසායනාගාරයේ ස්ථානාධිපති නදීර මාපිටියටත්, භෞත චිකිත්සක අංශයේ ස්ථානාධිපති ඉන්දික රත්නායකටත් මගේ කෘතවේදීත්වය පුද කරනවා.

කෙසේ වුවත්, පොලිස් රෝහල තවත් එක් පොලිස් ස්ථානයක් කිරීමට කටයුතු කරන පිරිස ගැන දැනට මම කිසිවක් නොකියමි......

164Bandula Karunachandra, Shirani AS and 162 others

116 comments

17 shares

Like

Comment

Share

පොලීසිය භාරව සිටින ගරු සරත් වීරසේකර ඇමතිතුමා ගේ අවධානයට....

Sarath Weerasekera

"ගරු අමාත්‍යතුමනි....,"
රටේ නීතිය ආරක්ෂා කරන්න ගිහින් මුලු ජීවිතයම ඒ වෙනුවෙන් පුජා කරලා, අවුරුදු 21 ක් පුරා මම ජීවත් වෙන්නේ රෝද පුටුවක..... ඒ වගේම අවුරුදු 07 ක් මේ රට වෙනුවෙන් උතුරේ යුද්ධ කල නිලධාරියෙක්... රට වෙනුවෙන් උපරිම සේවාවක් ශරීරාංග පුද කරලා ඉටු කල මට, අද ජීවත් වෙන්න නිවසක් නෑ.... අවුරුදු 20 ක් මට ජීවත් වෙන්න සිද්ධ වුනේ කුලී ගෙවල් වල. දැන් ජීවත් වෙන්න සිද්ධ වෙලා තියෙන්නෙ සහෝදරයාගේ නිවසේ. ජීවත් වෙන්න නිවසක් නැති නිසා ආරක්ෂක අමාත්‍යාංශයේ "අපි වෙනුවෙන් අපි " අරමුදලෙන් ක්‍රියාත්මක කරන "මෙත් සෙවන" නිවාස ව්‍යාපෘතියෙන් නිවසක් හදාගන්න මම ඉල්ලුම් කරේ 2019 දී... ග්‍රාම නිලධාරීගේ, ප්‍රාදේශීය ලේකම්ගේ, කොට්ඨාශ භාර පොලිස් අධිකාරීගේ නිර්දේශ ඇතුලු, එකී, මෙකී, සියලු ලිපි ලේඛණ සහිතව භාර දුන් ගොනුවට පොලිස් සුබසාධක අංශයේ අධ්‍යක්ෂවරයාගේ අනුමැතිය ලබා දී තිබුනේ 2019.10.07 වෙනිදා....

ගොනුව භාරදීලා අවුරුදු දෙකකට පස්සෙ පොලිස් සුබසාධක අංශයට මම කතා කරේ එතෙක් මගේ ඉල්ලීමට ප්‍රතිචාරයක් ලැබුනේ නැති නිසයි.... ඒ අවස්ථාවේ දී සුබ සාධක අංශයේ අධ්‍යක්ෂවරයා දැනුම් දැනුම් දුන්නේ මගේ ගොනුව අස්ථාන ගත වෙලා තියෙන නිසා නැවැත ගොනුවක් හදලා එවන්න අවශ්‍ය වන බවයි.... ඔහුගේ ඒ ප්‍රතිචාරය ගැන මම අතිශයින්ම විශ්මයට පත් වුනා. ඒ වගේම පොලිස් සුබසාධක අංශයේ ගැන ඉතාමත් කලකිරීමට පත් වුනා. මෙවැනි වගකීම් විරහිතව කටයුතු කරන පොලිස් සුබසාධක අංශය ගැන විස්වාසයක් තබන්න බැරි නිසා නැවැත ගොනුවක් සකස් කර ඔවුන්ට යවා, සුබ සාධක අංශයෙන් අපට සිදු වෙන මේ අසාධාරණ කම් ගැන 2021.03.25 දින ඔබතුමාට මම අභියාචනයක් ඉදිරිපත් කලා. ඔබතුමාගේ කාර්යාලයෙන් ඒ අභියාචනය ඉදිරි කටයුතු සදහා පොලිස්පතිවරයා වෙත යොමු කර තිබෙනවා.... පොලිස්පති විසින් එය ඉදිරි කටයුතු සදහා පොලිස් සුබ සාධක අංශයේ අධ්‍යක්ෂවරයා වෙත යවා ඇත. ගරු අමාත්‍ය තුමනි..., සුබ සාධක අංශයේ අධ්‍යක්ෂවරයා එයට මට එවු පිලිතුරු ලිපිය තමයි මේ තියෙන්නේ... ඔවුන් දන්වා සිටින්නේ යුද්ධයේදී ආබාධිත නිලධාරියෙකු නොවන බැවින් ප්‍රමුඛතාවයක් මට ලබාදිය නොහැකි බවයි.... ජීවත්වෙන්නට නිවසක් නොමැතිව, බරපතල, දැවෙන ගැටලුවකට මුහුණ දී සිටින මට ලැබුන පිලිතුර තමයි මේ....
පොලිස් සුබසාධක අංශයෙන් අපට හැමදාම ලැබෙන්නේ මෙවැනි කර්කෂ වු අප්‍රසන්න උත්තරමයි... කිසිම දවසක මේ අංශයෙන් පොලීසියේ නීතිය හා සාමය ආරක්ෂා කරන්න ගිහිල්ලා ආබාධිත වුන නිලධාරීන්ට සහන සලසන්න කටයුතු කරලා නෑ... අදටත් මම පාවිච්චි කරන රෝද පුටු පවා ලබාගන්න සිද්ධ වෙලා තියෙන්නෙ හිතවතුන්ගේ පරිත්‍යාග වලින් ... පොලිස් සුබසාධක අංශයෙන් සිදු කරනු ලබන්නේ අපි ඔබතුමාලා වෙත ලිපි මගින් ඉදිරිපත් කරන ගැටලු වලට, සහන සලසන්න, විසදුම් ලබා දෙන්න හැකියාවක් නෑ කියලා ආපහු ලිපියක් අපට එවන එක විතරයි... ගරු අමාත්‍යතුමනි...., 👉“අපි වෙනුවෙන් අපි” නිවාස ව්‍යාපෘතිය තියෙන්නේ යුද්ධයේදී මියගිය, ආබාධිත අය වෙනුවෙන් නම් මෙම ව්‍යාපෘතියෙන් අපට නිවාස ඉල්ලුම් කරන්නට දැනුම් දුන්නේ ඇයි....? 👉යුද්ධයේදී මෙන්ම, පොලීසියේ නීතිය ක්‍රියාත්මක කිරීමට යෑමේදී විපතට පත්වු නිලධාරීන්ට, අඩුම තරමේ පූර්ණ ආබාධිත නිලධාරීන්ටවත් නිවාස සාදා දෙන්න වෙනත් වැඩ පිළිවෙලක් ආරම්භ කරන්නේ නැත්තේ ඇයි...? 👉ඉටු නොවන බලාපොරොත්තු දී අවුරුදු ගනන් රස්තියාදු කරමින් අපට ණයක් අරන් නිවසක් සාදා ගන්න තියෙන අවස්ථාවත් නැති කරන්නේ ඇයි...? ගරු අමාත්‍යතුමනි..., අපි මුහුණ දී සිටින ගැටලු ඔබතුමා වෙත ඉදිරිපත් කරන්නේ පොලිස් සුබසාධක අංශයෙන් අපට කිසිදු සුබසාධනයක් සිදු නොවන නිසයි... ඒත්...., ඔබතුමා නැවැත ඔවුන්ටම ගැටලුව විසදන්න යොමු කිරීම තුලින් හා ඔවුන්ගෙන් ලැබෙන පිළිතුරෙන් ගම්‍ය වෙන්නේ අපට කිසි දිනක සාධාරණයක් ඉටු නොවන බවයි.... ගරු අමාත්‍යතුමනි..., 👉ඔබතුමා දිවා රෑ පොලිස් නිලධාරීන්ට නියෝග හා උපදෙස් ලබාදෙමින් කටයුතු කරන්නේ රටේ නීතිය හා සාමය ආරක්ෂා කරන්නටයි. එහෙත් එලෙස රටේ නීතිය හා සාමය ආරක්ෂා කරන්නට ගොස් විපතට පත්වන නිලධාරීන්ට මෙලෙස අන්ත අසරණ තත්ත්වයට පත්වන්නට සිදු වන්නේ නම් එය බරපතල ගැටලුවක් නොවන්නේ ද....????? පොලිස් සුබසාධක අංශය තිබෙන්නේ අපට මෙවැනි ලිපි එවන්නට නොව රාජකාරියේදී විපතට පත්වු නිලධාරීන් මුහුණ දී සිටින ගැටලු වලට හොඳින් ඇහුන්කම් දී, පැහැදිලිව අවබෝධ කරගෙන ඒ ගැටලුවලට නිසි පිලියම් ලබාදීමටයි... ඒත්..., එම රාජකාරිමය වගකීම ඔවුන් කිසිසේත් ඉටු කරන්නේ නැත.... අඩුම තරමේ ඔවුන් අපි මුහුණ දී සිටින ගැටලුව ගැන ඇහුන්කම් දෙන්නටවත් සූදානමක්, කාරුණික බවක් පෙන්වන්නේ නැත. දුරකතන ඇමතුමක් දුන් විට ඔවුන් හැකි පමණ උත්සාහ කරන්නේ ඉක්මනින් එය විසන්ධි කිරීමටයි... ඔබතුමා අවස්ථාවක් ලබාදෙන්නේ නම් සාක්ෂි සාධක සහිතව පොලිස් සුබසාධක අංශයෙන් සිදුවන මේ අසාධාරණකම් ඔප්පු කර පෙන්විය හැක.
පසුගිය වසරේ සිට ඔබතුමාට අප මුහුණ දි සිටින ගැටලු ගැන අභියාචනා කීපයක් ඉදිරිපත් කොට ඇතත් ඒවා කිසිවෙකට ද මෙතෙක් පිළිතුරක් වත් නොලැබීම පිළිබඳව කනගාටුව ප්‍රකාශ කර සිටින අතර එම අභියාචනා ඔබතුමාගේ කාර්යය මණ්ඩලය විසින් ඉදිරිපත් කර නොමැති දෝයි සිතේ.... පාතාලේ, මත්ද්‍රව්‍ය අපරාධකරුවන් මෙන්ම, වෙනත් ජාවාරම්කරුවන්, අත්අඩංගුවට ගැනීමට ගිය නිලධාරීන් ද, රථවාහන රාජකාරියේ යෙදී සිටියදී බරපතල අනතුරු වලින් තුවාල ලබා විපතට පත් වු නිලධාරීන් ද අද අන්ත අසරණ තත්ත්වයට පත්ව සිටින්නේ ඔවුන්ට සහන සලසන්න මෙතෙක් ඔබතුමාල කිසිවෙකු ගේ අවධානයක් යොමු වී නැති නිසයි. මම ආබාධිත තත්ත්වයට පත්වුනාට පස්සේ අවුරුදු 21 ක් පුරා පොලීසිය භාරව කොතෙකුත් ඇමතිවරු පත්වුනත්, පොලිස්පතිවරු පත්වුනත්, පොලිස් සුබසාධක අංශය දක්වන ප්‍රතිචාරයන්ගේ කිසිම වෙනසක් වෙලා නෑ. පොලීසිය භාරව ඔබතුමා පත්වුනාට පස්සේ අපි බලාපොරොත්තු වුනේ ඒ තත්ත්වය වෙනස් වෙලා අපට සහනයක් අත්වෙයි කියලයි. මොකද ඔබතුමාත් නිල ඇදුමක් ඇදි නිලධාරීයෙක් නිසා.... ඒත්..., ඒ බලාපොරොත්තුව තවමත් ඉටුවෙලා නෑ... නීතිය රකින්න ගිහින් ඇස් දෙකම අන්ධ වුන, දෑත් දෙපා අහිමි වුන, මොළයට සුෂුම්නාවට සිද්ධ වුන අනතුරු නිසා සදාකාලිකව ඇදන් වලට, රෝද පුටුවලට ජීවිත සීමා වුන අප වැනි නිලධාරීන් මුහුණ දී සිටින අවාසනාවන්ත තත්ත්වය ගැන පොලීසියේ බලධාරීන් කිසිවෙකු ඔබතුමා දැනුවත් කරන්නට මෙතෙක් කටයුතු කර නැති බව තමයි පෙනෙන්නට තියෙන්නේ .... අප නමට පමණක් පොලිස් විරු දිනය සමරන්නට යොදා ගන්නා පොලිස් විරුවන් පමණක් වී ඇත....
අවසන් වශයෙන් ඔබතුමා ගෙන් ඉල්ලා සිටින්නේ අපි මුහුණ දී සිටින ගැටලු වලට ඔබතුමා ගේ පුද්ගලික අවධානය යොමු කර සහන සැලසීමට කටයුතු කරන ලෙසයි... මෙම ලිපිය ද සමාජ මාධ්‍යයේ පලකරන්නට සිදු වුනේ, මෙවන් පසුබිමක් මතයි. ගරු අමාත්‍යතුමාගේ අවධානයට ලක්වෙනතුරු මේ ලිපිය Share කර මට සහය දක්වන මෙන් ඔබ හැමගෙන් ඉල්ලමි....

ජීවිතේ තවත් එක් අත්දැකීමක් 03.

ජීප් එක අත්දෙකින් Drive කිරීමේ හීනය හැබෑ කරගන්න යන ගමනේදී මට මුහුණ දෙන්නට වුන බාධක අභියෝග එමටයි...

ඒත්..., නොපසුබසින උත්සාහය, ධෛර්යය නිසා අවසානයේ මම හිතුවටත් වඩා හොදට ඒ හීනය හැබෑ කරගන්න පුලුවන් වුනා...

ඉතින් අද මම කියන්න යන්නේ

Manual වාහනේ Auto කරගැනීමේ දී මුහුණ දීමට සිදුවුන අභියෝග ගැන....

Mahindra scorpio Jeep එකේ පෙනුමට මම ආස වුනත්, engine එකේ සද්දෙට නම් මගේ පොඩ්ඩක් වත් කැමත්තක් තිබුනේ නෑ... සද්දේ නිකන් ටැක්ටර් එකක වගේ...😂😂😂

ඕකේ සද්දේ අඩු කරන්න මුල් කාලේ මම නොකරපු දෙයක් නැ... Injector pump, Injectors වගේ නොයෙකුත් උපාංග අලුත් වැඩියා කරත් සාර්ථක වුනේ නෑ... ඒකේ තිබුනේ උප්පත්තියේම දෝෂයක්...

මේක Wheel drive engine එකක් තිබුනේ.... ඒ නිසා සද්දේ කොහොමත් වැඩියි....

ජීප් එකට හරියන ජපන් engine එකක් Auto box එකක් එක්කම මේකට තියන්න මට අවශ්‍ය වුනා... එතනදිත් මම අවධානය යොමු කලේ, අංක එකට සද්දේ අඩු engine එකක් ගන්න. පිකප් එකත් හොද, ඉන්ධන පරිභෝජනය අඩු, කල් පැවැත්මත් හොද engine එකක් හොයාගන්න තමයි මම උත්සාහ කලේ.

ජපන් engine වලින් Nissan, Toyota, Mitsubishi, Isuzu engine වලට තමයි මගේ අවධානය යොමු වුනේ...

Engine capacity එක, තියෙන එකේ 2600 නිසා ඊට වැඩි එකක් තියන්න තමයි මම හිතුවේ.

Engine වල ගුණ දොස් මම මෙතන වැඩිය විග්‍රහ කරන්න යන්නේ නෑ... මොකද මේ filed එකේ මේ වාහන brand වලට Lovers ලා ඉන්නවා... එයාල කැමති නෑ තමන් පාවිච්චි කරන වාහන වල engine විවේචනය කරනවට...😂

ඒ නිසා ඒවා ගැන මම compare කරේ කොහොමද කියන එක ලියන්නේ නෑ...😂

කොහොමින් කොහොම හරි engine ගැන හොයලා, හොයලා දන්න කියන ගොඩක් දෙනෙක් ගෙන් අහලා මම select කර ගත්තේ Isuzu 4JG2 3.1 intercooler turbo auto transmission engine එක.... මේ engine එක ගැන කිව්වොත්, මේකේ සද්දේ ඇත්තෙම නෑ ... හඬ හරිම ලස්සනයි...

ඒ වගේම engine capacity එක 3100 ක් නිසා හොද පිකප් එකක් තියෙනවා.. කල් පැවැත්ම අතිනුත් ගොඩක් ඉදිරියෙන්...

ඉන්ධන පරිභෝජනයත් අනෙක් engine වලට වඩා හොදයි... මේ engine එක එන්නේ Isuzu bighorn Jeep වලට...

මගේ ජීප් රථයේ බර kg 2000ක්. ඒකට හරියන බරක් තමයි Bighorn එකේ තියෙන්නෙත්. Bighorn එකේ kg 2030 යි...

ඉතින් ඔය ආකාරයට මට සාර්ථකව engine එකක් තෝර ගන්න පුළුවන් වුනා....

engine එක මම ගත්තේ ගම්පොල අනුර මෝටර්ස් එකෙන්...

ඇත්තටම මට හොදම engine එකක් එතනින් අරගන්න පුලුවන් වුනා...

engine එක ගන්න ගිහින් හම්බ වුන අනුර මෝටර්ස් එකේ Pamalka Aluthge අද වෙන කොට මගේ හොද මිත්‍රයෙක්... 😃

නොයෙකුත් අවස්ථා වල අමතර කොටස් හොයාගන්න ප්‍රශ්න මතු වුනාම, ඔහු නිර්ලෝභීව අමතර කොටස් දීලා මට උදව් කරනවා.... මේ සමාජයේ එවැනි චරිත විරලයි. ඒ නිසා පමල්ක මට කල උදව් උපකාර සියල්ලටම මම කෘතවේදීත්වය පුද කල යුතු නිසයි ඔහු ගැන මේ සටහන් කලේ...

ගම්පොල ඉදලා engine එක අරගෙන ආවේ දෙල්කඳ garage එකකට... එතනට මම ගෙනාවේ මගේ මිතුරෙක් හදුන්වලා දුන්න කාර්මික මහත්තයෙක් නිසා... ඔහු මෝටර් මැකනික් ඉන්ජිනියර් කෙනෙක් කියලා තමයි කිව්වේ....

කොලඹ ප්‍රසිද්ධ කාර්මික විද්‍යා ආයතනයක පින්සිපල් හැටියටත්, වැඩකරපු කෙනෙක්...

වයසක වගේම අත්දැකීම් ගොඩක් තියෙන කෙනෙක් වගේ තමයි දැනුනේ, පෙනුනේ...😂

කාර්මික මහත්තයගේ මේ ක්ෂේත්‍රයේ අත්දැකීම් ගැන ගොඩක් කතා මට කිව්වා... කතාව ටිකක් එයාගේ වැඩි වුනාට වැඩේ බාරදෙන්න මම ඔහුව තෝර ගත්තා....

"මම මේකට engine එක තියලා දෙන්නම් කාර් එකක් වගේ smooth එකට"

අපි Money back granti තමයි වැඩකරන්නේ...."

ඔන්න ඔහොම කියලා තමයි වැඩේ භාර ගත්තේ....😂

මමත් කිසිම සැකයක් නැතිව වැඩේ බාර දුන්නා..

ඒ දවස්වල මටත් ලොකු කාර්මික දැනුමක් තිබුනේ නෑ... ඒ නිසා කියන දේවල් අහගෙන ඉන්න තමයි මට සිද්ධ වෙලා තිබුනේ...😂😂

සති දෙකකින් විතර වැඩේ කරලා දෙන්න තමයි පොරොන්දු වුනේ... සති දෙකකින් වාහනේ auto කරගෙන ගමේ යනවා කියලා හීන මවාගෙන තමයි මම හිටියේ...

සති දෙක ගෙවිලා ගියත් වැඩේ එතනම බව මට පෙනුනා... engine mount දෙකයි gear mount එකයි හරියට හදාගන්න බැරිව දඟලන බවක් තමයි පෙනුනේ....

අන්තිමේදී මෝටර් කාර්මික ඉංජිනේරු විදුහල්පතිතුමා ජීප් එක නිශ්පාදනය කරපු රටට බණින්න පටන් ගත්තා ලවක්, දෙවක් නැතිව...😂😂😂

මගේ තවත් යාලුවෙක් හිටියා Scorpio එකට 4JG2 engine එකක් තියපු. බලා ඉදලා බැරිම තැන මම කිව්වා ඒ ජීප් එක බලලා අදහසක් අරගෙන මේකේ mount ටික ගහමු කියලා....

"චැක්... මට ඕවා බලන්න ඕනි නෑ මම කරන්නම් වැඩේ කියලා..." ඒ පාර කියපි... මේ පුද්ගලයා ගේ වැඩ වලට වඩා තියෙන්නේ කයිවාරුව කියන එක මේ වෙන කොට මට හොදටම අවබෝධ වෙලා තිබුනේ..

තව කාගෙන්වත් දැනුමක් ලබා ගැනීම ඔහුට මදි පුංචි කමක්

හැටියට තමයි සැලකුවේ...

ඉතින් ඒ වෙන කොට මට හොදටම තේරුම් ගිහිල්ලා තිබුනේ වැඩේ අලවෙන්න යනවා කියලා...

ඒත් ඉතින් මට වැඩිය මැදිහත් වෙලා බලපෑම් කරන්නත් පුළුවන් කමක් තිබුනේ නෑ.... එහෙම උනොත් තවත් ප්‍රායෝගික ගැටළු ගොඩකට මට මුහුණ දෙන්න වෙන නිසා..

වැඩක් කරන්න යනකොට අවශ්‍ය පිලිවෙල, දැනුම, උපකරණ, කලමනා කිසිවක් නැතිව සාර්ථකව යමක් කල නොහැකි බව මම අත්දැකීමෙන් දන්න දෙයක්...

වාහනේට engine එක තියන්න යන වැඩ පිලිවෙලේ අඩු පාඩුකම් දකින කොට

අන්තිමේදී මට ඉතාමත් ආගන්තුක මෝටර් කාර්මික ක්ෂේත්‍රය ගැන අධ්‍යනයක් කරන්න සිද්ධ වුනා...

ඒ තුලින් මට හොයාගන්න පුළුවන් වුනා මේ මහදැන මුත්තයගේ දැනුමේ දුප්පත් කම...

මම අධ්‍යයනය කරද්දී සොයාගත්ත දෙයක් තමයි මේ Auto gearbox එක වැඩකරන්නේ computer box එකකින් කියලා...

මේ ගැන කිව්වම ඔහු කිව්වේ...

" පිස්සුද? මේක computer box එකකින් නෙවෙයි වැඩ කරන්නේ, මේ තියෙන්නේ kick down cable එක, මේකෙන් තමයි gear change වෙන්නේ...""

මමත් ඉතින් එතනින් එහාට argue කරන්න ගියේ නෑ... හයිකරලම බලමුකො gear change වෙන හැටි කියලා හිතාගත්තා....

මිත්‍රවරුනි.... මේ වෙන කොට මට හොදටම තේරුම් ගිහිල්ලා තිබුනේ වැඩේට මම තෝරගෙන තියෙන්නෙ වැරදි මිනිහෙක් කියලා... ඒත් ආපසු හැරෙන්න කොහොමවත් විදියක් තිබුනේ නෑ...

මම වැටිලා ඉන්න අමාරුවෙන් ගොඩ එන්නේ කොහොමද කියන එක ගැන තමයි ඊට පස්සේ මට හිතන්න වුනේ...

ජීවිතේ ඕනෑම අසීරු, අමාරු, දුෂ්කර අවස්ථාවකට පත් වුනත්, ඒ ඕනැම අවස්ථාවකට මුහුණ දෙන්න, ඒකෙන් ගොඩ එන්න ධෛර්යයක්, ශක්තියක් මට උත්පත්තියෙන් පිහිටලා තියෙනවා... බොහෝ දෙනෙක් ගැටලුවකට, කරදරයකට මුහුණ දීපුවම ඒ කරදරය ගැන හිත හිතා තැවෙනවා හැරෙන්නට ඒකෙන් ගොඩ එන්න තියෙන විකල්ප ක්‍රියා මාර්ග මොනවද කියලා හොයලා බලන්නේ නෑ...

අනිත් එක තමයි කෙනෙක් අමාරුවේ වැටුනම ඕක තමයි අපි කිව්වේ ඕක හරියන්නේ නෑ කියලා... අපරාදේ සල්ලි කියලා කියන්න බොහෝ පිරිසක් ඉන්නවා....

අපි කොහොම හරි වැඩේ ගොඩ දාමු... තව try එකක් කරලා බලමු කියන්න ගොඩක් වෙලාවට එක් කෙනෙක් වත් නෑ... ඉතින් මටත් මූණ දෙන්න වුනේ ඔය වගේ අවස්ථාවකට...

ඒත් මම පොඩ්ඩක් වත් සැලුනේ නෑ... තනිවම හිතුවා කොහොම හරි මම වැඩේ ගොඩදාගන්නවා කියලා...

මාසයක් විතර ගත කරලා යන්තම් mount ටික හදලා engine එක තියලා තිබුනා... gear selector එකට මෙයාල හයි කරලා තිබුනේ Hijet van එකක එකක්.... ඒක දැක්කම මට යකා නැග්ගා...👹

මම සල්ලි වියදම් කරලා ලස්සනට finishing එකක් බලාපොරොත්තු වුනාට මේ ලොකු උන්නැහේ කරන්නෙම වැඩේ අවුල් කරන එක...

ඒ අවස්ථාවේ දී මට පිහිටට ආවේ වාහනේ වයරින් කරන්න ආව Tikiri Wapa ටිකිරි. ඔහු තේරුම් ගත්ත

මම පත්වෙලා ඉන්න අසීරු තත්ත්වේ.. electrical part එකට අමතරව මගේ ඉල්ලීමට FB 14 කාර් එකක gear selector එකක් ටිකිරිගේ උදව්වෙන් සවි කරගත්තා...

මහදැන මුත්තගේ තර්කය වුනේ Hijet gear selector එක හැරෙන්න වෙන එකක් හයි කරන්න බෑ කියන එක... ඒත්, ඒ තර්කය පුස්සක් බව අපට පෙන්වන්න පුළුවන් වුනා....

ඔය වගේ නොයෙකුත් ප්‍රශ්න මතින් වාහනේ අටවගෙන Test run එකක් මුලින්ම ගියා... බුදු අම්මෝ වාහනේ හොදටම vibrations වැඩියි... ඒ වගේම අර මහදැන මුත්තා කිව්වට gear මාරු වෙන්නෙත් නෑ... L එකට දාලා පිකප් කරලා ඊට පස්සේ 2 එකට දාල ඉන්පස්සේ D එකට දාලා තමයි යන්න වුනේ...😂😂

Auto gear වුනාට Manual එකක වගේ gear දාගෙන තමයි යන්න වුනේ.... ඔය ජර මර ගොඩක් එක්ක කොහොම හරි මම වාහනේ ගෙදර අරන් ආවේ බොහොම කලකිරීමෙන්...

ඊට පස්සේ මට තිබුන අභියෝගය තමයි Vibrations නැතිව engine එක ආපහු තියාගන්න එක, ඒ වගේම Gear control unit එකක් හොයාගෙන හරියට වයරින් කරලා Auto gear shift වෙන්න හදාගන්න එක....

ඊලග කොටසින් මම කියන්නම් ඒ දේවල් කොහොමද මම ගොඩ දාගත්තේ කියලා.. .