Tuesday, March 12, 2019

නොහික්මුණ රියදුරන්ට එරෙහිව නීතිය ක්‍රියාත්මක කල පොලිස් නිලධාරියා නොහික්මුණ රියදුරෙක් විසින් මරා දමයි......

2019 මාර්තු 11 දින.

මේ සටහන ලියන්නට මා පෙළඹෙව්වේ මාධ්‍ය ප්‍රකාශකතුමා විසින් මියගිය නිලධාරියාගේ බිරිඳට හා දරුවන්ට සියලු වන්දි දීමනා මෙන්ම, සියලු සුබ සාධක කටයුතු ඉටු කරන බවට කල ප්‍රකාශයයි....

ඇත්තටම ඔහු ප්‍රකාශ කල පරිදිම එවැනි ආකාරයෙන් කටයුතු සිදු වෙනවා නම් කිසිදු ප්‍රශ්නයක් නොමැත.
නමුත්, ගැටලුව තිබෙන්නේ ඒවා නිසියාකාරව ක්‍රියාත්මක වෙනවාද යන්නයි.... ඒ වගේම චක්‍රලේඛ අණපනත් වලට පමණක් සීමාවී ඒ ලබාදෙන සහන ප්‍රමාණවත් ද යන්නයි.

නීතිය ක්‍රියාත්මක කිරීමේ දී මේ ආකාරයෙන් විපතට පත් වන
නිලධාරීන්ට සහන සැලසීමට යොදාගැනීමට හැකි චක්‍රලේඛ දෙකක් ඇත. ඒ රාජ්‍ය පරිපාලන චක්‍රලේඛ 22/93 යටතේ නිලධාරියා ලබමින් සිටි මූලික වැටුප (වෙනත් දීමනා කිසිවක් මෙයට අයත් නොවේ. ) මාස 120 කින් වැඩිකොට ලැබෙන මුදල වන්දියක් ලෙස ලබාදීම හෝ එසේ නැත්නම්, 2017 වර්ෂයේ දී නැවත බලාත්මක වු 1982 අංක 305 දරණ අමාත්‍ය මණ්ඩල තීරනය අනුව නිකුත් කල පොලිස්පති චක්‍රලේඛ 2582/16 අනුව නිලධාරියාට වයස අවුරුදු 55 ට එළඹෙන තෙක් වැටුප් ගෙවීම.

මෙයට අමතරව නිලධාරියාගේ විශ්‍රාම වැටුප බිරිඳට හා යැපෙන්නන්ට මාස් පතා ලබාදීම. දල වශයෙන් මේ විශ්‍රාම වැටුප රුපියල් තිස්දහසකට අඩුවේ.

රාජ්‍ය පරිපාලන චක්‍රලේඛ 22/93 අනුව ප්‍රතිලාභ ලබාදුනහොත්, මාස 120 ක වන්දිය මාස 120 ක් නොඑසේනම් අවුරුදු 10 ක් ජීවත් වනවිට හමාර වෙයි. ඒ වගේම මාස 120 ක වන්දි මුදල කල්ගතවන විට වැඩි වන ජීවන වියදමත් එක්ක වැඩි නොවන නිසා වන්දි මුදලේ වටිනාකම හීන වේ. මේ නිසා මේ වන්දි මුදලෙන් මාස 120 ක් ජීවත්වීමටවත් ප්‍රමාණවත් නොවේ. ඉන් අනතුරුව නිලධාරියාගේ බිරිඳටත් දරුවන්ටත් යැපෙන්නන්ට සිදු වන්නේ පෙර සඳහන් කල විශ්‍රාම වැටුපෙන් පමණි. දරුවන්ගේ සියලු වැඩකටයුතුත් සමඟ ඇයට මෙම විශ්‍රාම වැටුප ජීවත් වීමට කිසිසේත්ම ප්‍රමාණවත් නොවනු ඇත. තම ස්වාමියා තම පියා රට වෙනුවෙන් ඉටු කල මෙහෙවර වෙනුවෙන් ඔවුන්ට ද වන්දි ගෙවන්නට සිදු වේ. ඔවුන්ට මේ දුක් කරදර සියල්ලම උහුලන්නට සිදුවෙන්නෙ නිලධාරියාගේ වියෝ දුකද සමඟය. මෙය ඉතාමත් කනගාටුදායක තත්ත්වයකි. පෙර සඳහන් කල චක්‍රලේඛය පාවිච්චි නොකර පොලීසියේ පරිපාලනමය දෝෂයක් නිසා ක්‍රියාත්මක නොකල 1982 අංක 305 දරණ අමාත්‍ය මණ්ඩල තීරණය පරිදි නිකුත් කල පොලිස්පති චක්‍රලේඛ 2582/16 අනුව ප්‍රතිලාභ ලබාදුන හොත් නිලධාරියාට වයස අවුරුදු 55 ක් දක්වා නිලධාරියා ලබමින් සිටි සම්පූර්ණ වැටුප හා දීමනා කාලානූරූපීව වැඩි කිරීම් ද සහිතව ලබාගැනීමට හැකි වනු ඇත. මේ චක්‍රලේඛය පාවිච්චි කොට සහන සලසන්නේ නම් එයින් මුලින්ම සතුටට පත් වන්නේ මාය. එයට හේතුව මේ 1982 නිකුත් කල චක්‍රලේඛය පාවිච්චි කොට ත්‍රිවිධ හමුදා සාමාජිකයින්ට සහන සලසා ඇතත්, පොලීසියේ සිදු වු පරිපාලනමය දෝෂයක් නිසා එය ක්‍රියාත්මක කොට නැත. පොලීසිය සිදු කල මේ අසාධාරණය නිසා පුද්ගකව ම⁣ට වසර දහයක කාලයක් වැටුප් නොමැතිව ජීවත් වන්නට සිදු වුනි. ඇතැම් ආබාධිත නිලධාරීන්ට වසර 19 ක් කිසිදු වැටුපක් නොලබා රු 95000/= ක් වැනි සුළු වන්දි මුදලකින් පමණක් ජීවත් වන්නට සිදු විය. අවසානයේ මා විසින් 2009 වර්ෂයේ දී ගත් ක්‍රියාමාර්ගයන් හේතුවෙන් රාජ්‍ය පරිපාලන චක්‍රලේඛ 22/93 iv සංශෝධනය කර නීතිය ක්‍රියාත්මක කිරීමේ දී පූර්ණ ආබාධිත තත්ත්වයට පත්වන නිලධාරීන්ට පමණක් අවුරුදු 55 දක්වා වැටුප් ලබාගැනීමට හිමිකම ලැබුනි. කරුණු පැහැදිලි කිරීම වෙන පැත්තකට යොමු කිරීමට සිදු වීම ගැන සමාවෙන්න... ඒත් මේ කරුණද දැනගත යුතු බොහෝ දෙනා සිටී. දැන් ආයෙමත් කතාකරමු පෙර මම සඳහන් කල 1982 සි⁣ට පොලීසිය ක්‍රියාත්මක නොකල චක්‍රලේඛය ගැන. පොලීසිය විසින් මේ අස්ථාන ගතකර තිබූ චක්‍රලේඛය නැවත සොයාගෙන පොලිස්පතිවරයාට ලබාදී ඉන් අනතුරුව අමාත්‍යාංශයේ ලේකම්තුමාවද දැනුවත් කොට වසර දෙකක් පමණ ගත් අප්‍රමාණ වෙහෙස මහන්සිය හා කල දැඩි බලපෑම් හේතුවෙන් ⁣චක්‍රලේඛය 2017 නොවැම්බර් මස සිට නැවත ක්‍රියාත්මක කිරීමට පටන් ගෙන ඇත. ඉතිං මම රෝද පුටුවේ බොහෝ දුෂ්කරතා මැද ජීවත් වෙමින් මගේ කාලය ශ්‍රමය මුදල් වැයකරමින් ලබාගත් ජයග්‍රහණයක ප්‍රතිපලයක් තමයි මේ චක්‍රලේඛය නැවත ක්‍රියාත්මක කොට මේ ආකාරයෙන් රටේ නීතිය ක්‍රියාත්මක කිරීමේ රාජකාරිය දී විපතටපත් වන නිලධාරීන්ට සහන සැලසීම. එක එක ප්‍රකාශකතුමාලට නිලධාරියාට මේ මේ ආකාරයට සහන සලසනවා යැයි වහසි බස් කීමට අවස්ථාව උදාවුයේ මේ පසුබිම යටතේ බව සමහරවිට ඔවුන් නොදන්නවා විය හැකියි. මේ සටහනේ මම සටහන් කර ඇති කරුණු සියල්ල සනාථ කිරීමට අවශ්‍ය සියලුම ලිඛිත සාක්ෂිත් මා සතුව ඇත.

මෑතකදී ජනාධිපතිතුමා විසින් මියගිය හා ආබාධිත වු නිලධාරීන්ට ජීවිතාන්තය දක්වා වැටුප් ලබාදීමට ගත් තීරණය ප්‍රකාරව මේ නිලධාරියාගේ බිරිඳට එය ලබාගැනීමට හැකියාවක් නොමැත. ඒ මේ නිලධාරියා LTTE ත්‍රස්තවාදී ක්‍රියාවකින් මිය නොගිය නිසාය.

බලධාරීන්ගේ දැන් අලුත්ම නිර්වචනය වී ඇත්තේ ත්‍රස්තවාදී ක්‍රියාවකින් නොවන වෙනත් නීතිය ක්‍රියාත්මක කිරීමේ රාජකාරිය දී මිය ගියහොත් ඒ නිලධාරීයාගේ බිරිඳට, දරුවන්ට දරාගන්නට සිදු වන වියෝ දුක ද, ආර්ථික ප්‍රශ්න ද අඩු බවයි. ඒ වගේම ආබාධිත වු අප⁣ට ද දරන්නට වී ඇති මානසික වේදනාව ශාරීරික වේදනාව ආර්ථික ගැටලු ද අඩු බවයි. මෙවැනි පදනමක සිට බලධාරීන් දැන් අපට එක් එක් ආකාරයට සහන සලසයි...

අද නීතිය ක්‍රියාත්මක කිරීමේ දී මෙලෙස මිය යන්නේ හා ආබාධිතයින් වන්නේ එදා මෙහෙයුම් කලාපවල වසර ගනන් දිවි පරදුවට තබා සක්‍රීයව මෙහෙයුම් කටයුතු වල නියැලුණු නිලධාරීන්ම බව අඳ බාල බලධාරීන් නොදන්නා කම නිසා නීතිය ක්‍රියාත්මක කිරීමේ දී මේ රට වෙනුවෙන් දිවි පිදූ හා සදාකාලික ආබාධිතයින් වු අප අප්‍රමාණ කම්පාවට, වේදනාවකට හා කලකිරීමකට පත්ව සිටින්නෙමු. සිදු වු විපත දරාගන්නවා සේම මේ සිදුකරන අසාධාරණකම් දරාගැනීමට ද අද අපට සිදුව ඇත.

ප්‍රදීප් ද සිල්වා
කැඳවුම්කරු
නීතිය ක්‍රියාත්මක කිරීමේ රාජකාරියේදී දිවි පිදූ හා ආබාධිත වු නිලධාරී එකතුව.

Friday, February 22, 2019

දේශය පුවත් පතේ ලිපිය


අද 2019 පෙබරවාරි 23 දින.

දේශය පුවත් පතේ ලිපියක්......

උදේම දුරකථන ඇමතුමක්,

"අය්යේ මම දේශය පත්තරෙන්. ඔයාලගේ Article එක අද පත්තරේ තියෙනවා..."

දුරකථන ඇමතුම දේශය පුවත්පතේ ⁣වාර්තාකාරිනියක වු නිශානි ජයමාලි කරුණාරත්න ගෙනි.

ඇය මා මිත්‍ර Sumudu Hewapathirana සමඟ

18 වෙනිදා ආරක්ෂක අමාත්‍යාංශය අසබඬට පැමිණ, මේ රටේ නීතිය ක්‍රියාත්මක කිරීමේ රාජකාරිවලදී දිවිපිදූ හා සදාකාලික ආබාධිත වු අපගේ තොරතුරු ලබාගෙන, පුවත් පත් ලිපියක් සැකැසුවාය. එතනිනුත් නොනැවැතී ඇය ලිපිය පලකර මට දැනුම් දීමට තරම්, මෙලෙස නිහතමානි වුවාය.

ඇයටත් දීර්ඝ කාලයක සිට මගේ මිතුරෙකු වන දක්ෂ පුවත්පත් ඡායාරූප ශිල්පියෙකු වන සුමුදු මල්ලිටත් බෙහෙවින්ම ස්තුතිවන්ත වෙමි.

ඒ ලිපිය මේ...



Thursday, February 21, 2019

2019 පෙබරවාරි 18 දින සැන්දෑව

ඇමතුමක් තුල රැඳවුන බලාපොරොත්තුව....

" ඔයා හොඳට, පැහැදිලිව, ලස්සනට ඔයාලගේ ප්‍රශ්නේ පැහැදිලි කරා...., ඔයාල ඉන්න ගාන සඳහන් කරලා ඔයාලගේ අත්සන් එක්ක මට Letter එකක් දෙන්න... මම මේ ගැන හොයලා බලලා කටයුතු කරන්නම්...."

මේ ප්‍රකාශය මට කලේ ගරු ආරක්ෂක ලේකම්  හේමසිරි ප්‍රනාන්දු  මහතායි. තුන්වෙනි පාර්ශවයක උදව්වෙන් සවස් වරුවේ මට එතුමත් එක්ක දුරකතනයෙන් සම්බන්ධ වීමට ඉඩ කඩ සැලසුනි.  තරමක් බලාපොරොත්තුවක් තබාගත හැකි බවක් එතුමාගේ ප්‍රකාශය තුල ගැබ් වී තිබුනි.  ආරක්ෂක ලේකම් තුමාව සම්බන්ධ කරදුන් ඔහු පිළිබඳව පසුව හෙලිදරව් කරන්නම්.

නීතිය ක්‍රියාත්මක කිරීමේ රාජකාරියේ දී දිවි පිදු හා සදාකාලික ආබාධිත වු පොලිස්  නිලධාරීන් ඉල්ලා සිටින  යුක්තිය හා සාධාරණය හේමසිරි ප්‍රනාන්දු මහතා  අතින් ඉටුවන තුරු  බලා සිටින්නෙමු.

නීතිය ක්‍රියාත්මක කිරීමේ රාජකාරියේදී දිවි පිදු හා ආබාධිත වු මෙතෙක් මා හා සම්බන්ධ නොවු සියලුම පොලිස් නිලධාරීන්ට හා ඥාතීන්⁣ට හැකි ඉක්මනින් මා හා සම්බන්ධ වන ලෙස ඉල්ලමි.

කැඳවුම්කරු
නීතිය ක්‍රියාත්මක කිරීමේ රාජකාරියේ දී දිවි පිදු හා ආබාධිත වු පොලිස් නිලධාරී එකතුව.
0718186342

Tuesday, February 19, 2019

ආබාධිත පොලිස් නිලධාරියෙකුගේ දින සටහන්....01


අද 2019 පෙබරවාරි 18.

යුක්තිය සාධාරණය ඉටුකරගැනීම සඳහා ආරක්ෂක අමාත්‍යාංශය වෙත..............

මෙලෙස දහසක් දුෂ්කරතා විඳදරා ගනිමින් බලධාරීන් හමුවට යාමට සිදුවුයේ  වෙනත් කිසිවක් කිරීමට ඉඩක් නොමැති වු නිසාමය.   අපි  ලිපි ලේඛන වලින් කල ඉල්ලීම් වලට කිසිදු පිලිතුරක්  නොලත් බැවින් නිවෙසෙන් පිටට එන්නට  සිදු වුනි. එයට මාර්ගය සකස් වුයේ වගකිව යුතු බලධාරීන්ගේ ක්‍රියා කලාපයන්මය.

මහජන ආරක්ෂාව,  නීතිය හා සාමය සුරකීමේදී  රටවෙනුවෙන් ජීවිත පූජාකල හා ආබාධිත වු පොලිස් නිලධාරීන්  වන අපට බලධාරීන් විසින් කරුණු කාරනා හරිහැටි සොයා නොබලා ගන්නා ලබන ප්‍රයෝගික නොවන තීන්දු තීරණ නිසා  තවදුරටත්  අප අසරණභාවයට   පත්වී ඇති අතර සමානයන්ට අසමාන ලෙස සලකමින් අපව මානසික හිංසනයට ද ලක් කර ඇත. 

 කරුණු කාරනා සඟවමින් ව්‍යාජව  පුද්ගලයන් හෝ ආයතන ආරක්ෂා කරමින් මේ  බහුබූත ක්‍රමවේදයන් ඉදිරියට පවත්වාගෙන යාමට උදව් උපකාර කිරීම අපේ රට තව තවත් පරිහානියට ලක්කිරීමට දායක වීමකි.  ඒ නිසා මින් ඉදිරියට ආබාධිත  පොලිස් නිලධාරීයාගේ දිනපොත තුලින් ඇඟයීම් කලයුතු දේ ඇගයීමටත්, විවේචනය කල යුතු දේ විවේචනයටත් ක්‍රියා කරමි.

Saturday, February 2, 2019

Emoney

Online සල්ලි හම්බ කිරීම මෑත කාලයේ ඉතා ජනප්‍රිය මාතෘකාවක්.  මෑතක සිට මමත් මේ සම්බන්ධව උනන්දු වුනේ නිතර නිතර මේ ගැන ඇහෙන්නට වුන නිසා. කොහොමත් අපි කාගෙත් දවසෙන් වැඩි කොටසක්ම ගතවෙන්නේ  අන්තර්ජාලයේ සැරිසැරීමටනේ. නිකම්ම නිස්කාරනව අපි ඒ සඳහා වැයකරන මුදල් හා කාලය  යම් පලදායී කාර්යයකට යොමු කිරීම තුලින් යම් මුදලක් උපයාගැනීමට හැකි නම් එය අපි ලබන ආර්ථිකමය ජයග්‍රහණයක් බව මට පෙනුණා.  ඒත් මම මුහුණ දුන් ප්‍රධානතම ප්‍රශ්නයක් වුනේ e money ලබාදෙන බව පවසන දහසක් වෙබ් අඩවි තුලින් අපිව රැවටීමට වංචාවට ලක් නොකරන විශ්වාසවන්ත වෙබ් අඩවියක් සොයා ගැනීමයි. මම සැකයෙන් අවිශ්වාසයෙන් බොහෝ වෙබ් අඩවි පීර පීරා බලමින්  මාස ගණනක්  මේ පිළිබඳව අධ්‍යනය කළා.  මගේ උත්සාහයේ ප්‍රතිපලයක් හැටියට Online මුදල් උපයාගැනීමට හැකි ක්‍රම විධි කීපයක්ම අවසානයේ මට සොයා ගැනීමට හැකි වුණා.  මේ අතුරින් මගේ  සිත් ගත් වඩා පහසුවෙන් හා විශ්වාසවන්තව  මුදල් උපයාගැනීමට හැකි  වෙබ් අඩවියක් වුයේ  Ebates වෙබ් අඩවියයි.  ඉතිං මේ ලිපියෙන් මම උත්සාහ කරන්නේ Ebates වෙබ් අඩවියෙන් මුදල් උපයාගත හැකි ආකාරය පිළිබඳව ඔයාල දැනුවත් කරන්නයි.

Ebates කියන්නේ Affiliate Marketing කරන වෙබ් අඩවියක්. Amazon, ebay, Aliexpress වැනි Online Marketing වෙබ් අඩවි වලට අලුතින් Customers ලව හදුන්වලා දීම තමයි එයාලා කරන්නේ. ඒ සඳහා ඔවුන්ට විශාල කොමිස් මුදල් ප්‍රමාණයක් Online Marketing කරන ඒ වෙබ් අඩවි වලින් ලැබෙනවා. විශේෂයෙන්ම Online Marketing ජනප්‍රිය කිරීමේ කාර්යයේ ඔවුන් 1996 සිට යෙදී සිටිනවා. දැනට වෙබ් අඩවිය ගැන විස්තර මේ ඇති. ඔයාලට අවශ්‍ය නම් තවත් විස්තර අන්තර්ජාලය පිරික්සීමෙන් දැන ගන්න පුළුවන්.  දැන් මම විස්තර කරන්නම් කොහොමද මේ වෙබ් අඩවිය හරහා මුදල් උපයා ගත හැකි ආකාරය කියලා.

පියවර 01.
මේ සටහන අවසානයේ මම සඳහන් කර තිබෙන Link එක ඔස්සේ  Ebates වෙබ් අඩවියට ගොස් ඔයාලගේ email address එක ඇතුලු කර User name එකක් හා Password එකක් ලබාදී ඉතාමත් පහසුවෙන්  account එකක් සාදා Join විය හැකියි. (pic 01, 02) ඔබ laptop එකක් හෝ Desktop එකක් පාවිච්චි කරනවා නම් Google chrome එකෙන් Ebates extension එක install කරගන්න. (Pic 04)  ඒ වගේම ඔබ මේ සඳහා Phone එක පාවිච්චි කරනවා නම් Google play store වලින් ebates app එක Install කරගන්න. (Pic 05)





පියවර 02.
දැන් ඔබ කැමැතිම Online Marketing වෙබ් අඩවියකට පිවිසෙන්න. මමනම් කැමැති වුනේ Aliexpress වෙබ් අඩවියට. ඔබ කැමැති වෙබ් අඩවියකට පිවිස ඔබට අවශ්‍ය කරන භාණ්ඩ ඩොලර් 25 ක මුදලක් වියදම් කර  මිලදී ගත යුතුයි. Shipping charges හැර භාණ්ඩවල වටිනාකම පමනක් අවම ඩොලර් 25 ක් විය යුතුයි.  විශේෂයෙන් මේ මිලදී ගැනීම් කිරීමට පෙර ඔබ Chrome එකට Install කරගත් Ebates extension එක Active කරගත යුතුයි. Ebates extension එක Active වී ඇත්නම් ඒ logo එක නිල්පාටින් දිස්වේ. ( Pic 06)
එසේ Active වී නොමැති නම් එය දිස්වන්නේ රතු පාටිනි.(Pic 07)
 ඔබ Phone එකේ ebates app එක තුලින් ගමන් කරනවා නම් ගැටළුවක් නොමැත. ඩොලර් 25 ක් වියදම් කල විගස  Ebates වෙබ් අඩවියෙන්  ඩොලර් 10 ක මුදලක් ඔබේ Account එකට Welcome bonus ලෙස බැරවේ. ඒ වගේම Cash back යනුවෙන් තවත් 6% , 10% , 3% වගේ එක් එක් වෙබ් අඩවි ලබාදෙන Cash back ප්‍රමාණය අනුව තවත් මුදලක් ඔබේ ගිණුමට බැරවෙනවා. (pic 08)
මට නම් ඩොලර් 25 ට තවත් ඩොලර් 1.76 ක් ගිණුමට එකතු වුනා cash back ලෙස. මේ කාර්යය නිමකිරීමෙන් පසු ඔබේ ගිණුමට ඩොලර් 11 කට වඩා මුදලක් ලැබී තිබිය යුතුයි.


3 වන පියවර.
මේ පියවර තමයි ඉතාමත් වැදගත්. ඔබට Unlimited මුදල් උපයාගැනීමට මාර්ගය පෑදෙන්නේ මේ තුලින්. ඔබේ උත්සාහය, ධෛර්යය, කැපකිරීම වගේම ඔබට තිබෙන සමාජ සම්බන්ධතා හරහා උපයාගත හැකි ඩොලර් ප්‍රමාණය තීරණය වෙනවා.  සමහර විට මාසෙකට ඩොලර් 100 ක් 200 ක් හෝ ඩොලර් 2500 ක් හෝ ඊට වැඩි වෙන්නත් පුළුවන්. Ebates වෙබ් අඩවියෙන් ඔබටම අනන්‍ය වු Referrals link  එකක් ලැබෙනවා. ඒක ඔබේ ඥාතීන්, හිතමිතුරන් අතර email, facebook, imo, whatsapp, sms හෝ ඕනැම ආකාරයකට Share කල හැකියි. (Pic 03)
මේ Share කරන ඔබේ Link එක මඟින් කෙනෙකු පැමිණ ඔබ අනුගමනය කල පියවරවල් ඔස්සේ ගමන් කර ඩොලර් 25 ක භාණ්ඩ මිලදී ගත් විගස ඔබේ ගිණුමට ඩොලර් 25 ක මුදලක් බැරවේ. ඒ වගේම ඒ තැනැත්තාට ඔබ මුලින් ලබාගත් ඩොලර් 11 කට ආසන්න ප්‍රතිලාභය හිමි වෙයි. ඉන් අනතුරුව ඔහුට ලැබෙන Link එක Share කිරීම තුලින් ඔහුටත් ඔබට මෙන් මුදල් උපයා ගැනීමට අවස්ථාව උදාවේ. දැන් ඔබේ හිතට ඇතුල් වෙලා ඇත්තේ මේත් තවත් පිරමිඩ බිස්නස් එකක් කියලා. මටත් හිතුනේ එහෙමයි. ඒත් මෙතනදී ඔබේ යාලුවා උපයාගන්නා මුදල් වලින් කිසිම මුදලක් ඔබට ලැබෙන්නේ නෑ. එක යාලුවෙක් ගෙන් ඩොලර් 25 ක් පමණයි ඔබට උපයාගන්න පුළුවන්. මේ Post එක දාන්න කලින් මම කලේ මගේ ඥාතීන්ව පමණක් මේකට සම්බන්ධ කර අත්හදා බැලීමයි. මොකද මේ වගේ Post එකක් දාන්න කලින් මමත් ලොකු වගකීමක් දැරිය යුතුයි. හිටපු පොලිස් නිලධාරියෙකු නිසා මිනිසුන්ව වංචාවකට හසුවෙන ආකාරයේ තොරතුරක් ලබාදීම තරම් නොවන නිසා. මේ කටයුත්තේ දී වෙනදා අපි Online භාණ්ඩයක් මිලදී ගන්නවා සේම අපට අවශ්‍ය භාණ්ඩය මිලදී ගන්න පුළුවන්. වෙනස තියෙන්නේ අපි වියදම් කරන ඩොලර් 25 ක මුදල තවත් ආදායම් මාර්ගයකට යොමු කර ගැනීමයි. ලොකු ලොකු මුදල් හම්බකරගැනීමට ඔබ උනන්දු නොවන්නේ නම් දෙදෙනෙක් එකතු වුවහොත් ඩොලර් 50 ක භාණ්ඩ නොමිලේ මිලදී ගත හැකිවා සේම ඩොලර් 45 ක පමණ මුදලක් ඔබට නැවත ලබාගත හැක. ඩොලර් 95 ක පමණ මුදලක් ඔබ දෙදෙනාටම නිකම්ම උපයාගත හැකියි. ඔබට ලැබෙන බෝනස් මුදල ඩොලර් 11+යාලුවා නිසා ලැබෙන ඩොලර් 25 + යාලුවට ලැබෙන බෝනස් මුදල ඩොලර්11 = ඩොලර් 47+ඔබ දෙදෙනාට ලැබෙන ඩොලර් 50 භාණ්ඩවල වටිනාකම = ඩොලර් 97 

4 වන පියවර
Ebates Account එකට ලැබෙන මේ මුදල් අපට ලබාගත හැකි ආකාර දෙකක් තියෙනවා. චෙක් එකක් මඟින් හා Paypal මඟින් අපේ ATM Card එකට ලබාගන්න පුළුවන්. මෙතනදී චෙක් එකක් ලබාගන්නවාට වඩා ලේසිම හොඳම ක්‍රමය තමයි Paypal account එකට cash withdraw කරගන්න එක. හැබැයි ලංකාවට paypal වලින් මුදල් ගෙන්වා ගැනීමේ ප්‍රශ්ණයක් තියෙනවා. ඒත් ඒකටත් ප්‍රතිකර්මයක් තියෙනවා. Paypal account එකක් create කිරීමේදි යම් ක්‍රියාමාර්ගයක් අනුගමනය කිරීම තුලින් ඒ ගැටළුව ඉතා පහසුවෙන් විසඳගන්න පුළුවන්. Paypal account එකක් නිවැරදිව සාදාගන්නේ කොහොමද කියලා දැන ගැනීමට අවශ්‍ය අය Messenger වලින් මා සමඟ සම්බන්ධ වෙන්න. තවත් කාරණයක් මේ ebates account එකට අපට ලැබෙන මුදල් මාස තුනකට සැරයක් තමයි ලැබෙන්නේ. (Pic 09)

ඉතිං කවුරුහරි ඉන්නවනම් මේ සම්බන්ධව උනන්දුවෙන උත්සාහයක් අරන් බලන්න මෙන්න Link එක.





Sunday, September 30, 2018

රැඳුන ජීවිතය 05



“සර්.... සර්.....“

සිතිවිලි අතර සිටි මම ඒ ආමන්ත්‍රණයෙන් පියවි සිහියට පැමිණියෙමි.  කොටහේන පොලිස් ස්ථානයේ ආරක්ෂක සහායක නිලධාරියෙකු වු  වික්‍රමසිංහ මා ඉදිරිපිට විය.

“සර්... දැන්ද මෙහාට ගෙනාවේ.... “

මගේ හිස පිරිමදිමින් ඔහු විමසුවේය.

“ දැන් ටිකක් වෙලා... කොහොමද දන්නෙ මම මෙහාට ගෙනාවා කියලා...?

පාලු වාට්ටුවක තනිවම අතරමංව සිටි මට ඔහුගේ පැමිණීම පුදුමයක් ගෙන දුනි.

“පොලිස් පෝස්ට් එකෙන් අපට දැනුම් දුන්නා සර්.....“

මා නොදන්නා බොහෝ දේ සිදුවෙමින් තිබේ. රෝහල් පොලීසිය නිරන්තරයෙන් මා සම්බන්ධව තොරතුරු කොටහේන පොලිස් ස්ථානයට දැනුම් දෙමින් තිබී ඇත.  කොටහේන පොලිස් ස්ථානයෙන් මගේ උවටැන් කටයුතු සඳහා මේ නිළධාරියා  එවා ඇත්තේ ඒ අනුවය. වික්‍රමසිංහගේ පැමිණීම  මට මහත් අස්වැසිල්ලක් විය. මේ නිළධාරියාද මා සමඟ රාජකාරි කටයුතු වල නියැලුන අයෙකි. එබැවින් ඔහු මට සමීප අයෙකු ද විය.

වික්‍රමසිංහ පැමිණෙන තෙක් මම සිටියේ තනිවමය. ඇඳන් හත අටක් මා සිටි කොටසේ  තිබුන ද  ඒවායේ රෝගීන් කිසිවෙක් නොවීය. ආතුර වු ගත මෙන්ම මගේ සිතද නිසා ආතුරවන්නට පටන් ගෙන තිබුනි. වික්‍රමසිංහගේ පැමිණීම මේ නිසා මගේ සිතට යෝධ ශක්තියක් ගෙන ආවේය.

එකවිටම මට කැස්සක් ඇති වුනි. එය ක්‍රමයෙන් දැඩි විය. ඒ සමඟම පපුව තුළ රුධිරය සමඟ එක්රැස් වී තිබූ සෙම ඉවත දැමීමට අවශ්‍ය විය. නමුත් ඒ සඳහා වාට්ටුව තුල අවකාශයක් නොවීය. මගේ එම අවශ්‍යතාව වික්‍රමසිංහ සපුරාලුයේ සේලයින් බෝතලයක් කපා ගෙනැවිත්ය. කසින විට රුධිරය සමඟ පිටවන සෙම මම එම සේලයින් බෝතලයට දැමුවෙමි. ඔහු කිසිඳු පිළිකුලක් නොදක්වා ඒවා ඉවත දැමීමටද ගෙන ගියේය. ඔහු ඉටුකල මේ කාර්යය මගේ සිතේ තදින් සනිටුහන් විය. මට අප්‍රමාණ වූ සෙනෙහසක් ඔහු කෙරේ ඇති විය. ඕඩික්ලෝන් දමා මගේ හිස පිරිමදිමින් හිස රුදාවෙන් සිටි මට ඔහු ලබාදුන්නේ විශාල සහනයකි. ඔහු නිසා මගේ හිසටද, සිතටද සහනයක් ලැබුණි.

“කෝ.... කොහෙද මේ කැන්‍යුලා එක ගහලා තියෙන්නේ.....? මේක මෙතන ගහලා හරි යන්නේ නෑ.... අතට ගහන්න ඕන....“
රාත්‍රි ඹෟෂධ ලබාදීමට පැමිණි හෙද නිලධාරියා මා අසලට පැමිණියේ චෝදනාවක් ද එල්ල කරමිනි.

ඖෂධ හා සේලයින් ලබා දීමට කැන්‍යුලාව සවිකර තිබුණේ මගේ පාදයේය. එය දුටු හෙද නිළධාරියා දෝෂාරෝපණය කළේ එය මවිසින් සිදුකල ක්‍රියාවක් සේය. දැඩි සත්කාර ඒකකයේ සිටිද්දී එක දිගටම මගේ අත්වලට කැන්‍යුලා සවි කර තිබු බැවින් අත් ඉදිමී දැඩි වේදනාවක් ගෙන දුනි. එහිදී මගේ ඉල්ලීම පරිදි ඔවුන් මගේ පාද වලට කැන්‍යුලා සවි කරන ලදී.  පාදවලින් කිසිදු දැනීමක් නොවු හෙයින් කොපමණ කටු ඇන්නත් මට වේදනාවක් නොදැනුන නිසා එහි වාසිය මම අත්කරගෙන සිටියෙමි. ඒ වගේම ක්‍රියාකාරීත්වයේ තිබෙන මගේ අත් දෙක පරිස්සම් කරගැනීමට වෙනදාට වඩා මම උනන්දු වුණෙමි.

හෙද නිළධාරියා මගේ අතකට කැන්‍යුලාවක් සවි කළේ බොහෝ උත්සාහයක් ගෙනය. කැන්‍යුලාව සවි කිරීමට කීප අවස්ථාවක්ම ඔහු උත්සාහ දැරූ නිසා එය මට අධික වේදනාවක් ගෙනදුනි.  72 වාට්ටුවේදී හමු වූ හෙද හෙදියන් දැඩි සත්කාර ඒකකයේදී හමු වූ හෙද හෙදියන් තරම් කාරුණික නැතැයි මට සිතුණි. ඔවුන්ගේ ආමන්ත්‍රණයන්ගේ වෙනස්කම් අත්වින්දෙමි. වාට්ටුවල රෝගීන් විශාල පිරිසකට සේවය සැලසීමට ඔවුන්ට සිදුව තිබෙන නිසා එක් රෝගියෙන් අසළ රැඳී සිටීමටද ඔවුන්ට වැඩි කාලයක් නොතිබිණි. මේ කාරණා නිසා ඔවුන්ගෙන් වැඩි කාරුණික ප්‍රතිචාරයන් බලාපොරොත්තු  නොහැකි විය.

“වැලිඔය ආමි කෑම්ප් එකකට ගහලා.... දැන් ඒ පේෂන්ට්ලා මෙහෙට ගේනවලු.....සර්...“
වික්‍රමසිංහ මට ආරංචියක් ගෙන ආවේය.

වැලිඔය සිට කොළඹට තුවාල ලැබු සෙබළුන් ගෙන ඒමට ගතවන කාලය තුළ මියයන සෙබළුන්ද සිටිය හැක. මට වැදුන වෙඩි පහර එවැනි ඈත ප්‍රෙද්ශයකදී වුවානම්, නිසැකවම ඒ ගෙන එන අතරතුරදී මා මිය යනු නියතය. මගේ ජීවිතය රැකුණේ ඉතාමත් කෙටි කාලසීමාවක් තුල රෝහල්ගත කල නිසාය. මට එකවිටම සිහිපත් වුයේ මා මෙන් වෙඩි ප්‍රහාරයන්ට ලක්වුවන්ට ජීවත්වීමට ඇති අවස්ථාව ගැනය.

1996 දී, මම උතුරේ  රිවිරැස මෙහෙයුමට සම්බන්ධව රාජකාරි කරද්දි  බෝම්බ වෙඩි ප්‍රහාර වලට ලක්වූ සෙබළුන් පලාලි රෝහලට ඇතුළු කරන විටම අවසන් සුසුම් හෙළන අවස්ථා බොහෝමයක් දැක ඇත්තෙමි.  යුධබිමේදී මියයන සෙබළුන්ගේ උණුලේ ගලන සිරුරු  කළු ඉටිරෙදි වල ඔතා ට්‍රක් රථ වලින් පලාලි වෙත ගෙන එයි. නැවත එම මෘත ශරීර සුදු ඉටි රෙදි වල ඔතා තම ළඟම ඥාතියා ගේ පොලිස් වසම සඳහන්  ලේබලයක් පාදයේ ගැටගසා වෙනත් ට්‍රක් රථයකට පටවා පලාලි ගුවන්තොටුපළ වෙත යවයි. තම ළඟම ඥාතියා ගේ නම සහ විස්තර සඳහන් ලේබලය දකිද්දී ඒ ඥාතින්ගේ සිත් වලට ඇති වන කම්පනය කොතෙක් විය හැකිදැයි මට සිතාගැනීමට නොහැකි වුනි. මගේ සොහොයුරාද එවකට උතුරු යුධ බිමේ සේවයේ යෙදී සිටි නිසා මට මෙය ඉතා තදින් දැනුනි. යුද්ධයේදී මියයන සෙබළුන්ගේ මෘත ශරීර ප්‍රවාහනයට වෙනම ට්‍රක් රථ හා සෙබළුන් යොදවා තිබුණි. එය එකම ක්‍රියාවලියකි. මෙය මගේ ජීවිතයේ මා දුටු  අතිශයින්ම සංවේගජනක ක්‍රියාවලියකි. ඕනෑම කෙනෙකුගේ ප්‍රාණය නිරුද්ධ සිරුර  මේ විශ්වයේ තිබෙන අනෙක් ගස්, ගල්, ගොඩනැගිලි වැනි භෞතික වස්තූන් හා සමාන වන බව දුටු මම අනියත ලෝ දහම තව දුරටත් ඒ තුලින් අවබෝධ කර ගතිමි.

එදින මධ්‍යම රාත්‍රිය වන විට තුවාල වූ සෙබළුන් විශාල පිරිසක් මා සිටි වාට්ටුවට ගෙන ආහ. වේදනාවන්ගෙන් කෑ ගසන කෙඳිරිගාන අය ඒ අතර බොහෝ විය. හුදකලාව තිබූ වාට්ටුව රෝගීන්ගෙන් පිරී ඉතිරිණි. ගිලන් ඇඳන් ප්‍රමාණයද මදි විය. රෝගීන් දෙදෙනෙකුට එක ගිලන් ඇඳක් පාවිච්චි කිරීමටද සමහරෙකුට ට්‍රොලි මතම හිඳින්නටද සිදුවිය.

“අර හෙඩ් ඉන්ජර්ඩ් පේෂන්ට්ව මේ ඇඳට දාන්න.... මෙයාගේ කකුල විතරනේ අමාරු....“

ඇඳන් වල සිටින රෝගී පරීක්ෂා කරමින් බරපතල තත්ත්වයේ රෝගීන්ට ඇඳන් ලබා දීමට හෙදියන් කටයුතු කළහ. තුවාල වල බරපතල තත්ත්වය මත රෝගීන්ට ඇඳන් හිමි වීම හෝ අහිමි වීම සිදු විය. මා බරපතල තත්ත්වයෙන් සිටි නිසා තනිවම ගිලන් ඇඳේ සිටීමට හැකිවිය. එය මට ඒ අවස්ථාවේ හැටියට වරප්‍රසාදයක් වුණි.

පසුදින සිට මගේ පවුලේ සාමාජිකයින්ට, ඥාතිහිතමිත්‍රාදීන්ට  හා පොලිස් නිළධාරීන්ට මුල්ම වරට මට සමීපව සුව දුක් විමසීමට අවස්ථාව උදා විය. මගේ පපු පෙදෙසට ඇතුළු කර තිබූ නාල දැක සමහරෙක් ක්ලාන්ත විය. කෙසේ වුවත් මගේ ජීවිතය දැඩි අවදානම් තත්ත්වයක තිබෙන බව මෙන්ම මා පිළිබදව බලාපොරොත්තු තබා ගත හැකි තත්ත්වයක් ඒ වන විටත් නොමැති බවත් ඔවුන්ට සිතෙන්නට ඇත. කඳුළු පිරි සෝබරිත මුහුණු ඒ බව මට කියා පෑවේය.

“ඔයා බයවෙන්න එපා... අපි ඔයාව තනි කරන්නේ නැහැ.....“

සියළු දෙනා මට ජීවත් වීමට එලෙස දිරි දුන්හ. එතෙක් කලක් මෙතරම් විශාල පිරිසකගේ දැඩි අවධානයට සෙනෙහසට මෙන්ම ආශිර්වාද ලැබීමට මා පාත්‍රවී නොමැත. මේ කුළුදුල් අත්දැකීමෙන් මම සියුම් ආශ්වාදයක් ලැබූවෙමි. එයින් සිරුරේ වේදනා කැක්කුම් මෙන්ම හිතේ තිබූ දුක්ඛිත හැගීම්ද පහව ගොස් යම් ආරක්ෂාකාරී හැගීමක් සිතට දැණුනි.

“අපි නම් හිතුවේ නෑ මචං.... උඹත් එක්ක ආයෙත් මෙහෙම කථා කරන්න පුළුවන් වෙයි කියලා....“

කොටහේන පොලිස් ස්ථානයේ මගේ සමීපතම මිතුරා වූ උප පොලිස් පරීක්ෂක රවි රත්නායක පැවසුවේය.

“අපට ආරංචිය ලැබුණේ ඔයාට පාතාලෙන් වෙඩි තිබ්බා කියලා.... අර මෝගන් අල්ලන්නත් එක්කනේ out එක දාලා තිබුණේ.... ඉතිං... අපි හිතුවේ ඒ ගිහින් මොකක් හරි ඇටෑක් එකක් වෙලා කියලා... ආරංචිය ලැබුණ ගමන් අපි ඔක්කොම එළියට බැස්සා තුවක්කු අරං... වෙඩි තියපු උන් හොයන්න....“

“ඉතිං... කවුරුවත් කිව්වෙ නැද්ද මිස්ෆයර් එකක් කියලා....“

“ නෑ... රාළහාමිලා තුන්දෙනාම අඬ අඬා  සර්ට වෙඩි වැදුණා කියලා විතරයි කිව්වේ.... පස්සේ උන් ටිකක් නෝමල් වුණාම තමයි ඇත්ත සිද්ධිය කිව්වේ..... මුළු පොලිසියම එදා මළගෙයක් වගේ.... මම නයිට් S.D.O. පැයෙන් පැයට මම ICU  එකට call කරලා අහනවා ඔයාට සිහිය ආවද කියලා.... OIC මහත්තයාත් නිදාගත්තේ නැහැ..... පාන්දර 2ට විතර OIC මහත්තයා කථා කරලා කිව්වා කෝවිලට ගිහින් පඬුරක් ගැට ගහන්න කියලත්... අපි කාටවත් එදා රෑ නින්ද ගියෙත් නෑ......“

රත්නායක මා මුහුණ දුන් අනපේක්ෂිත අනතුරින් පසු පොලිස් සථානයේ ඇති වූ තත්ත්වය එක හුස්මට  විස්තර කළේය. මට ළබැඳිව කටයුතු කළ ස්ථානාධිපති ඇතුළු සියළුම නිළධාරීන් කෙරෙහි මා සිත තුළ කෘතඥතාපූර්වක හැඟීමක් ඇතිවිය.

“එක්සිඩන්ට් වෝඩ් එකේ කාමරයකට අරන් ඩොක්ටර්ස්ලා මාව බලන කල්ම මට සිහිය තිබුණා..... ඉන් පස්සේ මොනවා වුණාද කියන්න මම දන්නේ නෑ......“

තව කොටසක් ලබන සතියේ...